Debenhams og M&S aftur komnar í skotgrafirnar í Bretlandi

Ný orrusta um viðskiptavini í jólavertíðinni milli verslunarkeðjanna Debenhams og Marks & Spencer hófst í dag. Debenhams tilkynnti um 20% afslátt af vörum sínum næstu þrjá daga og búist er við svari frá M&S á morgun. Baugur á hlut í Debenhams gegnum Unity.

Fjallað er um málið í Daily Mail en þessar tvær verslanakeðjur hafa eldað grátt silfur saman síðan jólavertíðin hófst í Bretlandi fyrir tveimur vikum síðan. Hefur gengið á með tilboðum og útsölum og neytendur hagnast sem aldrei fyrr.

Í framhaldi af þessu hafa aðrar verslanir blandað sér í slaginn og segja má að algert verslunarstríð geysi nú í verslunargeira Bretlands, hið skæðasta á síðustu 30 árum að sögn Daily Mail.