Engin samdráttur í jólaversluninni þrátt fyrir kreppuna

Kaupmenn segjast, þrátt fyrir kreppu, ekki finna fyrir samdrætti í jólaverslun. Skýringu á því gæti verið að finna í að Íslendingar kaupa nú gjafir í verslunum hérna heima í stað þess að ferðast í stórum flokkum erlendis til að kaupa gjafirnar eins og tíðkaðist fyrir kreppu.

 

Fjallað er um málið í Morgunkorni greiningar Glitnis. Þar segir að við þetta bætist aukin kaupgleði erlendra ferðmanna. Þetta gefur til kynna að viðsnúningur verði á þjónustujöfnuði við útlönd en halli á þjónustujöfnuði hefur verið einn þáttur í viðvarandi viðskiptahalla undanfarin ár.

 

Þá hefur gengisþróun þau áhrif að þeir erlendu ferðamenn sem koma til landsins versla meira en áður eins og glögglega hefur komið fram í aukningu á endurgreiðslu á virðisaukaskatti á undanförnum mánuðum.

 

Nýjar tölur Seðlabankans sýna að þessi viðsnúningur er nú þegar hafinn, en þjónustujöfnuður við útlönd var neikvæður um 1,6 milljarða kr á 3. ársfjórðungi þessa árs sem er mun minni halli en hefur verið á sama fjórðungi undanfarin ár. Búast má við að allhröð sókn verði í átt til jafnvægis í þjónustujöfnuði rétt eins og í vöruskiptum.

 

Frá því að kreppan braust út í byrjun október hefur utanlandsferðum Íslendinga fækkað um tæplega helming. Alls fóru 45 þúsund Íslendingar að utan um Leifsstöð í október og nóvember á þessu ári, en til samanburðar var þessi fjöldi 83 þúsund á sama tímabili fyrir ári síðan. Í nóvember fækkaði brottförum Íslendinga um 60% frá sama mánuði fyrir ári síðan.