JPMorgan skilar hagnaði á þriðja ársfjórðungi

JPMorgan Chase, stærsti bankinn í Bandaríkjunum að markaðsvirði, skilaði um 527 milljónum dollara í hagnað á þriðja ársfjórðungi þessa árs samanborið við 3,4 milljarða dollara hagnað á sama tímabili í fyrra. Þetta kemur fram í hálffimmfréttum Kaupþings.

Þar segir einnig að ef ef ekki væri fyrir 581 milljóna dollara gengishagnað vegna yfirtökunnar á viðskiptabankastarfsemi Washington Mutual í síðasta mánuði hefði félagið verið rekið með um 54 milljóna dollara tapi, sem þó er mun betri afkoma en greiningaraðilar höfðu spáð. Gengi bréfa í JP Morgan lækkaði lítillega á sama tíma og S&P 500 fjármálavísitalan lækkaði um 4 prósent.

„Forsvarsmenn bankans sögðu í framhaldi af uppgjöri að þeir búist við verulegum samdrætti í tekjum næstu misserin þar sem verulega hafi hægt á hagkerfinu. Tekjur félagsins eru þegar farnar að dragast saman og námu 14,7 milljörðum dollara á þriðja ársfjórðungi samanborið við 16,1 milljarð á sama tíma í fyrra," segor greiningardeild Kaupþings.