Búið að stöðva sölu Kaupþings á 10% hlut í Storebrand

Búið er að stöðva sölu Kaupþings á 10% hlut sínum í tryggingarfélaginu Storebrand.

Í tilkynningu um málið kemur fram að þar sem norska ríkisstjórnin hafi tekið við rekstri Kaupþings í Noregi hafi salan verið stöðvuð. Hlutur Kaupþing í félaginu er því enn í 20%.

Samkvæmt frétt um málið á vefsíðunni E24.no var það fyrir tilstuðlan tryggingarsjóðs bankana í Noregi sem salan var stöðvuð. Málið er að koma í veg fyrir að eigur Kaupþings í Noregi hverfi úr landinu.

Söluandvirði hlutarins nam 988 milljónum norskra króna, jafnvirði sautján milljarða íslenskra. Salan var þvinguð eftir veðkall frá Royal Bank of Scotland sem kom bréfunum í verð með áskriftasölu í gegnum hollenska risabankann ABN Amro.