Leitað í íbúð franska fjársvikarans

Lögreglan leitaði í íbúð Jerome Kerviel sem rekinn var frá franska bankanum Societe Generale fyrir óheimila spákaupmennsku sem olli því að um 480 milljarðar íslenskra króna gufuðu upp úr bókum bankans.

Fjórir borgaralega klæddir lögreglumenn sáust í íbúð Jeromes í Neuilly hverfinu í París. Þegar lögreglumennirnir yfirgáfu íbúðina voru þeir allir með risa stóra kassa fulla af gögnum.

Þeir sögðust sjálfir vera lögreglumenn en gáfu ekki upp úr hvaða deild þeir komu. Þeir vildu lítið annað gefa upp um aðgerðina.

Kerviel hefur ekki látið sjá sig á almannafæri síðan fréttir af málinu bárust fjölmiðlum en myndir af honum hafa breiðst út á netinu undanfarið.

Ljósmyndarar og blaðamenn sitja fyrir utan heimili hans í París, skrifstofu hans og sumarhúss sem hann á í Frakklandi.