Greenspan segir fleiri munu verða gjaldþrota

Þjóðnýting Fannie Mae og Freddie Mac, gjaldþrot Lehman Brothers, kaup Bank of America á Merrill Lynch, ásamt alvarlegum fjárhagsvandræðum Washington Mutual, áttundu stærstu bankastofnun Bandaríkjanna og AIG, stærsta tryggingarfélags landsins, eru alvarlegustu vandræði sem fjármálakerfi bandaríkjanna hefur staðið frammi fyrir síðan í heimskreppunni. Á fjármálabloggsíðum vestanhafs er nú talað um hrun fjármálakerfis landsins og verstu fjármálakreppu í sögu Bandaríkjanna.

Alan Greenspan, fyrrverandi seðlabankastjóri Bandaríkjanna, lýsti því yfir í viðtali við ABC sjónvarpsstöðina um helgina að fyrirséð væri að fleiri stór fjármálafyrirtæki yrðu gjaldþrota, þó hann vildi meina að það þyrfti ekki að vera alvarlegt vandamál ef stjórnvöld héldu rétt á spilunum.

"Ástandið verður stöðugt verra, og er að verða verra en nokkuð sem ég hef orðið vitni að. Og það lítur út fyrir að það eigi enn eftir að versna og við sjáum ekki til botns" sagði Greenspan sem var ómyrkur í máli. Hann staðhæfði meðal annars að Bandaríkin stæðu frammi fyrir kreppuástandi sem kæmi í versta falli upp einu sinni á hundrað ára fresti.

"Ég trúi því ekki að við getum tekist á við fjármálakreppu af stærðargráðu sem sést aðeins einu sinni á hundrað ára fresti án þess að heimshagkerfið gefi undan." Greenspan sagði ennfremur að ólíklegt væri að það létti á ástandinu fyrr en húsnæðisverð í Bandaríkjunum hættir að falla.

Greenspan hefur undanfarið verið gagnrýndur harðlega fyrir hlutdeild sína í húsnæðis og lánsfjárblöðrunni sem olli núverandi ástandi, en meðan hann var Seðlabankastjóri vísaði hann á bug varnaðarorðum um að stýrivextir bankans væru óeðlilega lágir, skuldir almennings í Bandaríkjunum hættulega háar og húsnæðisverð óeðlilega hátt.