NBA í nótt: Brandon Roy með 52 stig

Tvö af sterkustu liðum Vesturdeildarinnar í NBA-körfuboltanum, San Antonio og Phoenix, töpuðu bæði sínum leikjum fyrir liðum sem hafa verið á hraðri uppleið að undanförnu. Brandon Roy átti stórleik í liði Portland.

Orlando lagði San Antonio, 90-78. Dwight Howard var aftur mættur til leiks eftir að hafa misst af tveimur leikjum vegna meiðsla og stóð sig vel - skoraði fjórtán stig og tók þrettán fráköst. Jameer Nelson bætti við 24 stigum fyrir Orlando.

Þetta var fyrsti leikurinn af strangri leikjatörn hjá Orlando um jólin en næst mætir liðið LA Lakers og svo New Orleans um sjálf jólin. Orlando hefur verið á miklu skriði að undanförnu og hafa unnið sjö af síðustu átta leikjum sínum.

Tim Duncan var stigahæstur leikmanna San Antonio með nítján stig en liðið var 23 stigum undir í þriðja leikhluta. San Antonio náði að rétta sinn hlut í fjórða leikhluta en náði þó ekki að ógna sigri Orlando að einhverju ráði.

Portland vann Phoenix, 124-119, þar sem Brandon Roy fór á kostum og skoraði 52 stig. Þar af setti hann niður þriggja stiga körfu þegar mínúta var til leiksloka og veitti Portland það forskot sem það þurfti til að innbyrða sigurinn á lokakafla leiksins.

Þetta er persónulegt met hjá Roy sem sagði að þetta hafi verið hans besta frammistaða hvað sóknarleik varðar. „Það er kannski fullmikið sagt að karfan hafi bara verið of stór en sjálfstraustið var svo sannarlega til staðar. Mér fannst bara að hvert einasta skot sem ég tók myndi fara ofan í."

Roy hitti úr fjórtán af 27 skotum utan af velli og nítján af 21 á vítalínunni.

Steve Blake átti einnig góðan leik og skoraði 22 stig og gaf tíu stoðsendingar. Þá var LaMarcus Aldridge með sextán stig.

Hjá Phoenix var Amare Stoudemire stigahæstur með 23 stig, Matt Barnes var með 22 og Shaquille O'Neal nítján. Steve Nash var með fimmtán stig og ellefu stoðsendingar.

Staðan í deildinni