Spiluðu póker með líf og dauða Nyhedsavisen til síðustu stundar

Íslenskar milljónir, undirferli, Mecom-stjórinn David Montgomery, kínverskur auðmaður og gömul Opel Corsa bifreið með bilaðan hljóðkút. Þetta eru höfuðatriðin í frásögn Jyllands-Posten um pókerinn sem spilaður var um líf og dauða Nyhedsavisen til síðustu stundar útgáfunnar.

Jyllands-Posten hefur skrifað ítarlegar úttektir á endalokum Nyhedsavisen í þessari viku. Þar kemur m.a. fram að þeir Morten Lund aðaleigandi Nyhedsavisen og David Montgomery eigandi Mecom, sem gefur út Berlingske Tidende og fríblaðið Urban, hafi rætt ítrekað saman áður en ákveðið var að leggja Nyhedsavisen niður.

Fram hefur komið á Business.dk að Morten Lund hafði unnið að því að fá Mecom til að senda rúma 2 milljarða kr. til ensks félags sem er í eigu vinar hans Morten Söndergaard Petersen gegn því að útgáfa Nyhedsavisen yrði lögð niður. Ekki er hægt að túlka þetta öðruvísi en að svíkja átti aðra eigendur Nyhedsavisen og lánadrottna um þessa upphæð. Þetta mál er nú til rannsóknar hjá efnahagsbrotadeild lögreglunnar í Kaupmannahöfn.

David Montgomery eigandi Mecom og Lisbeth Knudsen forstjóri Berlinske Media segjast aldrei hafa séð þessa tillögu frá Morten Lund. Þau segja aðeins að samningaviðræður við Lund hafi farið út um þúfur og að stuttu síðar hafi Nyhedsavisen verið lagt niður.

Þá kemur til sögunnar kínverskur auðmaður Richard Li að nafni. Hann mun hafa verið volgur fyrir því að skjóta nýju fé inn í Nyhedsavisen og var "draugur hans á sveimi um útgáfuna" eins og það er orðað i eina tvo mánuði en ekkert kom út úr því.

Og í lokin lét Morten Lund BMW-bílinn sinn standa heima og fékk í staðinn lánaðan gamlan Opel Corse með bilaðan hljóðkút hjá nágranna sínum. Á þeim bíl ók hann til starfsmanna Nyhedsavisen til að tjá þeim að útgáfan yrði lögð niður.