Norðursjávarolían komin niður í 46 dollara tunnan

Verð á Norðursjávarolíunni fór niður í rúma 46 dollara á tunnuna í morgun en það þarf að leita aftur til ársins 2005 til að finna sambærilegt verð en þá kostaði tunnan 45 dollara.

Í umfjöllun á Börsen um málið kemur fram að olíuverðið nú er þrefalt lægra en það var fyrir hálfu ári síðan. Fjármálakreppan hefur dregið verulega úr eftirspurn eftir olíu en inn í dæmið spilar einnig að OPEC ríkin gátu ekki komið sér saman um frekari niðurskurð á framleiðslunni á fundi sínum í síðustu viku.

Og verðið á bandarísku WTI olíunni er nú að nálgast verðið á Norðursjávarolíunni. Í morgun kostaði WTI olían 47,8 dollara tunnan.