Hollensk stjórnvöld eignast hlut í ING

Hollenski bankinn og tryggingafyrirtækið ING mun fá 10 milljarða evra í stuðning frá hollenska ríkinu. Þessi niðurstaða var gerð opinber í dag eftir funahöld forsvarsmanna bankans við hollenska seðlabankann og fjármálaráðuneytið. Þetta þýðir að hollenska ríkið mun eignast 8,5 prósenta hlut í ING en félagið gerir ráð fyrir því að tapa 500 milljón evrum á þriðja ársfjórðungi.

Hollenska ríkisstjórnin hefur einnig gefið út að 20 milljarðar evra verði settar til hliðar til þess að takast á vandamál efnahagskrísunnar sem nú dynur yfir heiminn. ING er á meðal stærstu banka heimsins með um 85 milljónir viðskiptavina um allan heim. Að sögn Reuters er bankinn með rúmlega 338 milljarða evra í innlánum og á skammtímareikningum. Fjármálaráðherra Hollands segir að bankinn hafi þurft á aðstoð að halda í þeim þrengingum sem nú eru uppi en hann þvertók fyrir að ING væri í meiriháttar vandræðum.

ING tók á dögunum yfir innistæður sparifjáreigenda í Bretlandi sem höfðu verið með innistæður sínar hjá Kaupþingi Edge.