Evrur frá ríkinu auðvelda Glitni að afla fjár annars staðar

Gylfi Magnússon, dósent við Háskóla Íslands segir að ljóst að Glitnir hefur lent í verulegum vandræðum. Hann segir inngrip ríkisins útvega bankanum talsvert af erlendum gjaldeyri annars vegar og auðvelda bankanum að afla fjár annars staðar hins vegar.

„Þetta eru mjög miklar fréttir," segir Gylfi. „Það er augljóst að Glitnir hefur lent í verulegum vandræðum sem kalla á þetta inngrip. Það hefur verið talað um erfiða fjármögnun í elendri mynt sem kemur ekkert á óvart," segir Gylfi og bendir á að þjóðarbúið allt búi við verulegan vanda sem endurspeglast í því að það eru mjög miklar skammtíma skuldir í erlendri mynt sem þarf endalaust að endurfjármagna.

„Glitnir hefur greinilega lent í vandræðum með þetta," segir Gylfi og bætir því við að viðbrögð Seðlabankans, að bæta inn eigið fé í evrum ættu að gera tvennt. „Annarsvegar að útvega bankanum talsvert af erlendum gjaldeyri og síðan að hækka eiginfjárhlutfall hans sem ætti að auðvelda bankanum að afla fjár annars staðar."

Aðspurður hvaða áhrif þessar fréttir hafa á fjármálalífið almennt segir Gylfi: „Þetta eru auðvitað afleitar fréttir fyrir þá sem voru hluthafar í bankanum. Þeirra hlutur er samkvæmt þessu metinn á 28 milljarða og það er veruleg lækkun frá því fyrir helgi. Það er einfaldlega eitthvað sem hluthafarnir verða að sætta sig við. Þeir eiga enga valkosti en þetta eru auðvitað afleitar fréttir fyrir þá." Gylfi segir ljóst að fleiri fregnir af gjaldþroum hjá almennum fyrirtækjum eigi eftir að berast á næstunni. „En um framtíð hinna fjármálafyrirtækjanna vil ég ekki vera með neinar getgátur um," segir Gylfi Magnússon.