Leikmennirnir tóku þessu vel

Guðmundur Guðmundsson segir að hann muni koma með einhverjar áherslubreytingar inn í íslenska landsliðið eftir að hann tók við því á ný eftir fjögurra ára hlé í dag.

"Einar Þorvarðarson og Guðmundur Ingvarsson höfðu samband við mig undir lok síðustu viku og eftir að ljóst varð að þeir sem þeir höfðu rætt við áður höfðu ekki áhuga, ákvað ég að ræða við yfirmenn mína hjá Kaupþingi. Þeir sýndu mér skilning og eftir það ákvað ég að fara í frekari viðræður við HSÍ. Raunverulega lá ekki endanleg ákvörðun fyrir hjá mér í þessu fyrr en í gærkvöldi," sagði Guðmundur í samtali við Arnar Björnsson í hádegisviðtalinu á Stöð 2.

"Ég ræddi við eina tvo leikmenn í landsliðinu því það er mikilvægt að þjálfari hafi gott bakland. Þeir tóku þessu vel og það var góð tilfinning að heyra þeirra sjónarmið," sagði Guðmundur, sem vildi ekkert tjá sig um það sem á undan gekk í þjálfaraleitinni hjá HSÍ.

Guðmundur samdi við HSÍ fram yfir Ólympíuleika og stýrir liðinu í undankeppni Ólympíuleikanna í maí og svo verða leikir við Makedóna í sumar í forkeppni HM.

"Ég verð að byrja strax að undirbúa mig og fara yfir síðustu keppni. Ég er ekki með mjög ólíkar hugmyndir og Alfreð. Það koma þó alltaf einhverjar áherslubreytingar með nýjum mönnum, " sagði Guðmundur.

Hann hefur ekki ákveðið hvern hann fær sér til aðstoðar en segir niðurstöðu að vænta í því fljótlega.