Þægilegasti ferðamátinn

Dr. Gunni segir frá því í sunnudagsblaði Fréttablaðsins að þriggja daga ferðalag til Íslands fyrir bandarískt par mundi kosta 300 þúsund krónur, eða fyrir þá sem eru góðir í deilingu, 100 þúsund kall á dag. Það er dýrt spaug að ferðast og getur verið hættulegt (matareitrun, flugslys), stressandi (biðraðir, tengiflug), niðurlægjandi (vopnaþuklið) og þreytandi (erlendur gjaldmiðill, minjagripaverslanir, óskiljanleg götukort).

Sjálfur er ég nýkominn úr tveimur mjög spennandi ferðalögum. Í fyrra skiptið fór ég í fótspor hins djarfa landkönnuðar Stanleys niður Blóðá eða Kongófljót, um þvera Afríku, um sum hættulegustu svæði veraldar þar sem enginn ferðamaður hefur stigið fæti sínum um áratuga skeið. Þetta ferðalag með einkaleiðsögumanninum Tim Butcher stóð í um það bil viku með góðri hvíld á milli og hófst í Eymundsson í Austurstræti, þar sem ég keypti bókina hans „Blóðá" (Blood River) fyrir spottprís.

Í nótt kom ég heim frá borginni Betlehem í Palestínu og Ísrael þar sem ég var inni á gafli hjá sögukennaranum Omari Yussef, íslömskum fræðimanni sem kennir við stúlknaskóla Flóttamannahjálpar Sameinuðu þjóðanna í Palestínu. Í fylgd með honum kynntist ég mönnum sem gefa sig út fyrir að vera þjóðernissinnar og baráttumenn fyrir frelsi en eru ótíndir glæpamenn sem misnota hörmungarástand í eigin þágu. Ég kynntist daglegu lífi fólks í þessu stríðshrjáða landi, lífi sem fjölmiðlar kunna ekki að segja okkur frá. Þetta ógleymanlega ferðalag kostaði innan við tvöþúsund kall og hver sem er getur fengið að upplifa það (á íslensku) í bókinni „Morðin í Betlehem" eftir Matt Rees.

Sennilega ferja íslenskir rithöfundar og kvikmyndagerðarmenn mun fleiri ferðamenn til Íslands en samanlögð flug- og skipafélög heimsins. Það er bæði gott og ódýrt að ferðast í bókum og kvikmyndum. Sjálfur tek ég bókina framyfir sem ferðamáta, því að í bókinni er frelsið meira til að skoða sig um og gefa sér tíma; kvikmyndin er meira eins og pakkaferð; maður er rekinn áfram og fær ekki að sjá nema sérvalda staði. Frásagnarlistin fjallar nú eins og ævinlega um að leiða fólk inn á áður ókunna stigu.