Abramovich tapar gríðarlega á gullnámu sinni

Auðjöfurinn Roman Abramovich er í tómu tjóni með fjárfestingu sína í gullnámufyrirtækinu Highland Gold. Frá því að hann keypti 4% hlut í fyrirtækinu fyrir ári síðan hefur hann tapað um 35 milljörðum kr..

Og vandræðin halda áfram að sögn Timesonline. Nú hefur Highland Gold, sem er fimmta stærsta námufyrirtæki Rússlands, ákveðið að fresta opnun á tveimur nýjum námum. Önnur þeirra er staðsett í Chukokta þar sem Roman er héraðsstjóri. Vinnsla átti að hefjast í báðum námunum á næsta ári en hefur verið frestað um óákveðinn tíma.

Ástæðan fyrir þessu er að lausafjárstaða Highland Gold er slæm þessa daganna. Fyrirtækið hefur orðið fyrir barðinu á fjármálakreppunni því verð á gulli hefur fallið á sama tíma og mjög erfitt er að fá lánsfé.