Buffet vill alls ekki að Henry Poulson verði einráður

Ofurfjárfestirinn Warren Buffet vill alls ekki að Henry Poulson fjármálaráðherra Bandaríkjanna verði einráður og án eftirlits með svokallaðan ruslsjóð upp á 700 milljarða dollara.

Sjóðurinn er höfuðatriðið í björgunaraðgerðunum sem rætt hefur verið um og er ætlað að kaupa upp undirmálslán og önnur slæm lán af bankakerfinu í Bandaríkjunum. Er málið til umræðu á bandaríska þinginu þessa stundina og mætir mikilli andstöðu meðal þingmanna úr röðum bæði Demókrata og Repúblikana.

Í samtali við Financial Times í dag segir Buffet að hann telji að tillagan um sjóðinn eins og hún er nú gefi Poulsen alltof mikil völd og að Poulsen sé ekki maður til að ráða við slíkt.

Buffet segir að ákvarðanir Poulsen í síðustu viku í sambandi við björgun AIG tryggingarfélagsins séu vafasamar. Fyrst hafi hann hafnað því að bjarga AIG en síðan boðið félaginu 85 milljarða dollara ríkislán til að bjarga því eftir að markaðurinn reis upp á afturlappirnar vegna fyrri ákvörðunarinnar. Buffet telur að Poulsen beri beina ábyrgð á því að björgunin var yfirleitt nauðsynleg.

Þá vill Buffet meina að þegar Poulsen fékk óútfyllta ávísun frá þinginu til að bjarga Freddy Mac og Fannie May hafi hann leyst málið á þann hátt að ein versta fasteignakreppa í Bandaríkjunum frá upphafi varð niðurstaðan.