Flughált í morgunsárið

Það er flughált á götum Reykjavíkur nú í morgunsárið og ástæða til að brýna fyrir ökumönnum að fara varlega af þeim sökum. Eins er mjög hált víðast hvar á norður- og vesturlandi þar sem var frost í nótt. Það er helst á sunnanverðu landinu sem hiti hefur haldist yfir frostmarki.

Eitthvað virðist sem ökumenn séu komnir í sumargírinn þar sem björgunarsveit frá Hólmavík þurfti að koma tveimur bílum til aðstoðar á Eyrarfjalli í gærkvöldi. Nokkuð þungfært var um heiðina og sumardekk komin undir báða bíla þannig að þeir komust hvorki aftur á bak né áfram.