Aldrei fleiri þróað tölvuleik

Tuttugu þúsund sjálfboðaliðar hafa boðist til að taka þátt í þróun fyrstu persónu skotleiks sem verður spilaður á netinu. Það er sama fyrirtæki og gerði hina geysivinsælu Counter-Strike leiki sem þróar leikinn. Dave Perry aðalhönnuður fyrirtækisins, Acclaim segir að allt að 100 þúsund sjálfboðaliðar verði fengnir til að þróa leikinn og ef 1% þeirra getur eitthvað af viti sé björninn unninn. Aldrei hafa jafn margir tekið þátt í þróun tölvuleiks.

Fyrstu persónu skotleikir hafa notið sívaxandi vinsælda og eru í dag vinsælastir leikja sem spilaðir eru yfir internetið. Nýji leikurinn hefur fengið vinnuheitið Top Secret og verður að sögn þeirra sem hann þróa sá lang flottasti hingað til. Sjálfboðaliðar geta enn skráð sig á síðu Acclaim.