Milestone tekur 16,5 milljarða lán

Fjárfestingafélagið Milestone ehf. hefur gengið frá lánasamningi við alþjóðlega fjárfestingabankann Morgan Stanley um töku láns fyrir 16,5 milljarða krónur til þriggja ára. Lánið er veitt í tengslum við endurfjármögnun félagsins.

Í tilkynningu frá Kauphöll Íslands segir að lántakan komi í kjölfar erlendrar fjámögnunar Milestone í fyrra þegar annar alþjóðlegur fjárfestingabanki tók þátt í fjármögnun Milestone vegna kaupa á öllu hlutafé félagsins Sjóvá.

Þar segir ennfremur að rekstur og efnahagur Milestone hafi vaxið hröðum skrefum á undanförnum árum samhliða því sem unnið hafi verið að breytingum á skipulagi félagsins og mótun skýrrar fjárfestingastefnu.

Helstu eignir Milestone eru ríflega 20% hlutur í Glitni hf, tryggingafélagið Sjóvá hf. og 85% hlutur í fjárfestingabankanum Askar Capital.