Heimsmarkaðsverð á hráolíu rauk yfir 90 dali á tunnu á fjármálamörkuðum aðfaranótt föstudags en viðlíka verðmiði hefur aldrei áður sést á svartagullinu.
Tvennt liggur til grundvallar verðhækkuninni: Í fyrsta lagi stendur bandaríkjadalur mjög lágt gagnvart helstu gjaldmiðlum, ekki síst evru, auk þess sem spenna á milli Tyrkja og Kúrda í norðurhéruðum Írak hefur farið vaxandi í vikunni.
Verðið lækkaði um og yfir einn dal í gær og stóð hráolíuverðið í 88,37 dölum á tunnu á fjármálamörkuðum í Bandaríkjunum um miðjan dag í gær en verð á Brent Norðursjávarolíu í 83,87 dölum á tunnu.
Fjármálaskýrendur segja hagnaðartöku fjárfesta skýra verðlækkunina að mestu og reikna með að verðið fari í hæstu hæðir á ný innan skamms.
- jab
