Stærsti prentsamningur Íslands í höfn

Prentsmiðjan Oddi og Birtíngur útgáfufélag ehf. hafa gert með sér samning um prentun allra tímarita Birtíngs. Þetta mun vera einn stærsti prentsamningur sem gerður hefur verið hér á landi og sá stærsti sem gerður hefur verið um prentun tímarita. Samkvæmt honum prentar Oddi yfir 220 tölublöð af tímaritum Birtíngs á ári.

Virði samningsins hefur ekki verið gefið upp.

Í samningnum felst að Oddi prentar rúmlega fjögur tölublöð Birtíngs í hverri viku. Það eru vikublöðin Séð og heyrt og Vikuna auk mánaðarblaðanna Gestgjafinn, Nýtt líf, Hús og híbýli, Sagan öll, Golfblaðið, Ísafold og Mannlíf. Árlegur fjöldi er áætlaður vel yfir 2 milljónir eintaka.

Haft er eftir Jóni Jósafat Björnssyni, framkvæmdastjóra Odda, í tilkynningu að samningurinn sé hagstæður fyrir báða aðila sem meðal annars þýði að fyrirtækið geti tekið stærri skref í fjárfestingum hvað varðar framleiðsluna sjálfa og þjónustuferlið. „Það eru spennandi tímar framundan í tímaritaútgáfu í heiminum í dag og talsverðir möguleikar á bæta þjónustu okkar enn meira en nú er. Allt kostar þetta hins vegar talsverðar fjárhæðir en þessi samningur um prentun allra tímarita Birtíngs minnkar áhættu okkar verulega," segir Jón.