Olían er bílum mikilvæg

Við smurningu á bifreiðum er heilmargt sem huga þarf að. Smyrja þarf vélina, gírkassann, fram- og afturdrif og millikassann. Árni Jónsson, starfsmaður í Smurþjónustu Heklu, útskýrir hlutverk olíunnar. Árni segir nýrri bíla í dag vera með lengra þjónustutímabil en áður var. „Áður voru eknir um 7.500 kílómetrar á milli smurninga en nýrri bílar þurfa ekki að koma nema á 15.000 eða 30.000 kílómetra fresti. Svo er fjöldi bíla með aksturstölvu sem lætur vita þegar komið er að smurningu en olían er náttúrulega dýrari þegar svo langt er á milli smurninga,“ segir Árni og bætir því við að mismunandi sé hvaða olíutegund sé sett á bílana og fer það eftir tegund bílsins. „Við erum eingöngu með umboðsbíla frá Heklu í þjónustu hjá okkur og erum þá með allar upplýsingar í tölvu um þessa bíla, olíumagn og annað. Þannig vitum við hvaða olía fer á hvern bíl, hvaða þykkt og hvaða tegund olíu og annað.“ Árni segir alla bíla brenna olíu, allt að einum lítra á hverja þúsund kílómetra. „Þá þarf að bæta einum lítra á bílinn og þannig viðhelst fituinnihaldið í olíunni. Hún brennur og fer út um útblásturskerfið á bílnum,“ segir Árni og bendir á að nákvæmlega eins bílar geti brennt mismunandi miklu af olíu eftir því hvernig þeir eru keyrðir og fleira. Hlutverk olíunnar er margþætt og má þar nefna að hún kemur í veg fyrir að málmfletir nuddist saman og að nýtileg orka tapist við núninginn. Þá gegnir hún einnig því hlutverki að kæla þá hreyfihluta sem kælivökvinn nær ekki til og flytur óhreinindi í olíusíuna og heldur þannig hreyflinum hreinum. sigridurh@frettabladid.is