Grænna epli lofað

Apple bregst við gagnrýni frá umhverfissinnum. Steve Jobs, forstjóri Apple, hefur gefið út yfirlýsingu þess efnis að fyrirtækið muni bæta umhverfisstefnu sína á næstunni. Ætlunin sé að fjarlægja eitruð efni úr tækjum frá Apple, þar á meðal Mac-tölvunum, iPod og MP3-spilurum.

Einnig á að auka endurvinnslu eldri framleiðsluvara. Jobs tók fram að Apple myndi hætta að nota arsenik í tæki sín í lok árs 2008, þá ætti að hætta notkun kvikasilfurs í skjái og nota þess í stað LED-skjái en fyrsta Mac-tölvan með LED-tækni verður sett á markað síðar í ár.

Umhverfisverndarsamtök, líkt og Greenpeace, hafa beint spjótum sínum að Apple í baráttu sinni við að fá tæknifyrirtæki til að minnka notkun eitraðra efna í framleiðslu sinni. Baráttan hefur greinlega haft einhver áhrif.