Morðið ekki tengt undirheimunum

Skotmaðurinn var enn á staðnum þegar sendibílstjórinn forðaði særða manninum af vettvangi. Málið er ekki talið tengjast undirheimum samkvæmt heimildum Vísis.

Maðurinn var skotinn í brjóstið á Sæbrautinni úr .22 kalibera riffli laust fyrir klukkan tólf í morgun. Sendibílstjóri sem átti þar leið framhjá tók særða manninn upp í og keyrði hann í átt að Laugardalslauginni. Samkvæmt heimildum Vísis var skotmaðurinn enn á staðnum þegar sendibílstjórinn tók manninn upp í.

Málið er ekki talið tengjast undirheimunum og hefur lögreglan ekki viljað útiloka að um árás án tilefnis hafi verið ræða. Heimildir segja að maðurinn hafi verið að skipta um dekk þegar á hann var ráðist.

Fórnarlambið, sem er karlmaður fæddur árið 1972, lést skömmu eftir klukkan eitt í dag.

Enginn hefur verið handtekinn vegna skotárásarinnar en sérsveit lögreglunnar er í viðbragðsstöðu samkvæmt heimildum Vísis.