Stórt skref stigið í samrunaferlinu

Félögin 25 sem hér eru skráð í Kauphöll fóru inn á samnorrænan lista OMX-kauphallasamstæðunnar við opnun markaðarins á mánudag og verða eftirleiðis kynnt með sænskum, finnskum og dönskum félögum á aðalmarkaði Nordic Exchange.

Við þessi tímamót var Árni M. Mathiesen fjármálaráðherra fenginn til að hringja nýrri kauphallarbjöllu sem send var til landsins í tilefni af fullri þátttöku kauphallarinnar hér í OMX-samstarfinu. Þórður Friðjónsson, forstjóri Kauphallarinnar, kvaðst reyndar hafa átt von á minni grip, sem slegið væri á með hamri. „En fékk svo tilkynningu um 25 kílóa pakka á pósthúsinu,“ sagði hann glaðbeittur áður en hringdur var inn nýr viðskiptadagur á slaginu tíu. Hann segir þó ekki standa til að slá inn hvern dag með þessum hætti heldur verði bjallan notuð við hátíðlegt tækifæri.

„Þetta er fyrsta stóra skrefið í samþættingunni og við vonumst til þess að okkur takist á þessu ári, meira og minna, að ljúka samættingunni við norræna markaðinn,“ segir Þórður og kveður samstarfið við OMX-samstæðuna hafa gengið mjög vel. Sérstaklega hafi verið gaman að finna undrun OMX yfir hraða og sveigjanleika í ákvarðanatöku hér, sem sé meiri en annars staðar í samstæðunni, og hafi á vissan hátt einkennt útrás íslenskra fyrirtækja. „Við fylgjum þessu eftir innan OMX og viljum endilega að þau taki þar upp eitthvað af þessum ágætu siðum okkar.“

Jukka Ruuska, forstjóri OMX Nordic Exchange sem hér var staddur í tilaefni af tímamótunum, sagði íslenska markaðinn um margt einstæðan fyrir vöxt sinn síðustu ár og benti á að íslensk félög yrðu nálægt tíund af stór­félögum á norræna listanum.

Hann er bersýnilega ánægður með starfsaðferðir íslensku kauphallarinnar og hrósar samstarfinu. „Mér líkar vel við þessa vafningalausu nálgun sem laus er við allt kjaftæði þegar kemur að verkum,“ segir hann og hlær. Hann segir mikinn feng að því að fá Kauphöllina hér inn í OMX-samstarfið, því þótt landið sé smátt sé viðskiptalífið með því umsvifamesta í hlutfalli við stærð þjóðarinnar sem sjáist. „Áður en íslensku fyrirtækin 25 bættust inn í aðallista Nordic Exchange vorum við þar með um 20 stórfyrirtæki, en núna bætist þar næstum tugur við. Þetta er í raun sláandi. Annað dæmi er íslensku bankarnir og fjármálastofnanir sem eru mikilvirkir þátttakendur í norrænu viðskiptalífi.“

Stærstu verkefni OMX um þessar mundir segir Jukka Ruuska snúa að því að ljúka að fullu samþættingarferli kauphalla og fá úr þeirri vinnu fullan ávinning. Þar fyrir utan er OMX að ljúka við aðra útgáfu miðlunarhugbúnaðar síns. Til lengri tíma litið segir hann svo horft til frekari vaxtar samstæðunnar með stofnun fleiri svæðisbundinna markaða. „Þar horfum við sérstaklega til Mið- og Austur-Evrópu og af þeim sökum hef ég dvalið langdvölum í löndum á borð við Búlgaríu og Slóveníu,“ segir hann og kveður spennandi tíma fyrir dyrum.