Minni hagnaður hjá Samherja

Útgerðafélagið Samherji skilaði hagnaði upp á 1.915 milljónir króna á síðasta ári samanborið við 3.104 milljónir króna árið 2005. Þrátt fyrir minni hagnað eftir skatta námu tekjur samstæðunnar 23,7 milljörðum króna sem er 11 prósenta aukning á milli ára.

Rekstargjöld námu 18.298 milljónum króna og hagnaður fyrir afskriftir og fjármagnsliði (EBITDA) 5.406 milljónum króna. Til samanburðar nam EBITDA 3.921 milljónum króna í hitteðfyrra.

Bókfært eigið fé Samherja í lok síðasta árs nam 9,2 milljörðum króna sem er rétt rúmlega 2,1 milljarði króna meira en við lok árs 2005

Heildar eignir jukust um 13.283 milljónir króna og stafar aukningin að verulegum hluta af fjárfestingum Kaldbaks, dótturfélags Samherja. Þessi mikla stækkun á efnahagsreikningi samstæðunnar hefur þau áhrif að eiginfjárhlutfall samstæðunnar lækkar úr 25% í 22%, að því er segir í uppgjör Samherja.

Uppgjör Samherja