Fasteignir voru seldar úr Símanum

Í október samþykkja Skipti að selja Fasteignafélagið Jörfa til Exista Properties. Exista er stærsti eigandinn í Skiptum. Upphaflega þegar Símanum var skipt upp var fjármálaráðherra spurður, fyrir hönd ríkisstjórnarinnar sem seldi Símann, hvort við það væri nokkuð að athuga. Hins vegar var ekki leitað eftir leyfi til að selja félagið, og þar með flestar fasteignir Símans, út úr Skiptum.

„Það var ekki gerð athugasemd við uppskiptingu Símans í Mílu, Símann og Jörfa. Hún var í samræmi við skilyrði kaupsamningsins á meðan þetta rýrði ekki verðmæti félagsins og eign hluthafanna. Eigendur Skipta þurftu því ekki að spyrja ríkið hvort selja mætti fasteignafélagið. Það rýrir ekki verðmæti Skipta. Hluthafar eru í raun betur settir á eftir. Söluhagnaðurinn nam rúmum 1,3 milljörðum króna. Þá fjármuni, sem áður voru fastir í fasteignum, er nú hægt að nota í fjárfestingar sem eru arðbærari en þessar eignir," segir Brynjólfur Bjarnason, forstjóri Skipta.

Fjármálaráðuneytinu var ekki tilkynnt um þessa sölu. Í samtali við Markaðinn sagði fjármálaráðherra, Árni M. Mathiesen, að sér virtist sem hluthafar væru að minnsta kosti jafn vel settir eftir söluna á fasteignum Símans og fyrir. Hann hafði samt ekki kynnt sér málið. Engar athugasemdir hafa verið settar fram um þennan gjörning af hálfu stjórnvalda og kaupin voru gerð með samþykki allra hluthafa.

Í raun lýkur ekki einkavæðingarferlinu fyrr en búið er að standa við skilmála kaupsamningsins og selja þrjátíu prósenta hlut til almennings og annarra fjárfesta. Pólitísk átök í aðdraganda sölunnar árið 2005 snerust meðal annars um aðgang venjulegs fólks að einkavæðingu ríkisfyrirtækja. Stofnað var sérstök hreyfing undir forystu Agnesar Bragadóttur og Orra Vigfússonar til að vekja athygli á þessu og berjast fyrir aðkomu almennings. Í ljósi þess vakna spurningar um hvort það sé í anda kaupsamningsins að selja eignir út úr félaginu þó að ekkert mæli sérstaklega gegn því. Væri til dæmis heimilt að selja Mílu út úr félaginu eða aðrar stórar eignir áður en almenningur fær tækifæri til að kaupa í Skiptum?

Samkvæmt heimildum Markaðarins hafa engar aðrar sambærilegar eignir og Jöfra verið seldar út úr Símanum og Skiptum á síðastliðnum þremur árum. Skipti, sem hefur gert leigusamninga við Jöfra, á einnig forkaupsrétt á eignunum. Verðmatið var byggt á leigusamningum sem Síminn og Míla höfðu gert við Jöfra. Þar sem leigusamningar lágu ekki til grundvallar, svo sem hvað varðar lóðaréttindi, voru eignirnar metnar af tveimur óháðum fasteignasölum og var fundið meðalverð. Þessar upplýsingar koma frá Skiptum.