Landsbankinn spáir aukinni verðbólgu

Greiningardeild Landsbankans spáir því að vísitala neysluverðs hækki talsvert í september, eða um 1,4 prósent. Gangi það eftir mun verðbólga fara úr 3,4 prósentum í 4,3 prósent.

Í verðbólguspá bankans segir meðal annars að hækkunina megi rekja til útsöluloka sem muni leiða til töluverðrar hækkunar á skóm og fötum auk þess sem verð á húsbúnaði muni hækka samfara því. Þá spilar inn í útreikningana verðhækkun á eldsneyti og matvöru en verð á hveiti og smjöri hefur hækkað nokkuð á erlendum mörkuðum upp á síðkastið.

Þá er gert ráð fyrir áframhaldandi hækkunum á fasteignaverði og veikingu krónunnar.

Verðbólguspá Landsbankans