Ekið á gangandi vegfaranda í Reykjanesbæ

Ekið var á gangandi vegfaranda á mótum Vesturgötu og Hringbrautar í Reykjanesbæ nú skömmu eftir hádegið. Lögregla hefur eftir vitnum að slysinu að ungur maður hafi hlaupið yfir götu og orðið þá fyrir bíl sem kom akandi en þó ekki á miklum hraða. Við það kastaðist vegfarandinn upp á vélarhlíf bílsins og þaðan á götuna og hlaut þungt höfuðhögg. Hann komst þó til sjálfs sín og var fluttur á sjúkrahús í Reykjanesbæ. Þar fór hann að kvarta undan verkjum í kviði og var hann því fluttur með sjúkrabíl til Reykjavíkur til frekari skoðunar. Ekki hafa fengist nánari upplýsingar um slysið.