Nýr framkvæmdastjóri TM Software

Stefán Þór Stefánsson hefur tekið við starfi framkvæmdastjóra hjá TM Software - Custom Development (áður Origo) af Einari Gunnari Þórissyni sem tekið hefur við nýju starfi hjá TM Software Healthcare. Stefán hefur víðtæka reynslu af ábyrgðarstörfum tengdum fjármálum og sölu- og markaðsmálum fyrirtækja.

Í tilkynningu frá fyrirtækinu segir að Stefán stýri 34 starfsmönnum hjá TM Software sem vinni að þróun sérhæfðra hugbúnaðarkerfa, vef- og viðskiptalausna fyrir netið fyrir mörg af stærstu fyrirtækjum og stofnunum landsins. Þá ber Stefán ábyrgð á stjórnun og rekstri einingarinnar, stefnumótun og áætlanagerð. Auk þess sinnir hann samskiptum við viðskiptavini, samningagerð, sölu- og markaðsmálum.

Stefán, sem fæddist 1969, er með BA-gráðu í alþjóðlegum samskiptum frá Methodist College í Norður-Karólínu í Bandaríkjunum og hefur sótt fjölda námskeiða í tengslum við starf sitt. Hann var áður sölu- og markaðsstjóri TM Software - Origo ehf. á árunum 2001-2005.