Valur samþykkti tilboð Häcken

Valur og sænska úrvalsdeildarliðið Häcken hafa komist að samkomulagi um kaupverð á miðvallarleikmanninnum unga, Ara Frey Skúlasyni, sem slegið hefur í gegn með Valsmönnum í Landsbankadeildinni í sumar. Þetta staðfesti Ótthar Edvardsson, framkvæmdarstjóri knattspyrnudeildar Vals, í samtali við Fréttablaðið í gær. Ari Freyr og fulltrúi sænska liðsins, sem staddur var hér á landi í gær, eiga þó eftir að komast að samkomulagi um kaup og kjör sem og lengd samningsins.

Kaupverð Ara Freys er ekki gefið upp en Ótthar staðfesti að það hafi verið sanngjarnt. "Jú, það var sanngjarnt. Annars hefðum við ekki tekið því." Aðspurður segir Ótthar að það hafi verið erfitt að ætla að halda Ara Frey hér á landi. "Það er óhjákvæmilegt að hann fari út, hann hefur vakið það mikla athygli. Enda munum við aldrei koma í veg fyrir að strákar eins og Ari Freyr uppfylli drauma sína um atvinnumennsku. Svona er lífið, við hefðum gjarnan viljað halda honum lengur enda afburða knattspyrnumaður á ferð sem á framtíðina fyrir sér. En þetta er auðvitað allt háð því að samningar náist milli hans og félagsins."

Samkvæmt heimildum Fréttablaðsins vilja forráðamenn Häcken semja við Ara Frey út leiktíðina 2010. Ekki er ólíklegt að frá þeim málum verði gengið nú á allra næstu dögum og að Ari Freyr haldi þá um leið út til Svíþjóðar og taki þátt í fallbaráttu liðsins í sænsku úrvalsdeildinni en eins og er er liðið í þriðja neðsta sæti deildarinnar með tíu stig eftir þrettán leiki.

Ef Ari Freyr gengur frá samningum við Häcken verður það sjötta úrvalsdeildarliðið í Svíþjóð sem hefur einn eða fleiri Íslending í sínum röðum.