Íbúðalánasjóður hækkar vexti

Íbúðalánasjóður hefur hækkað útlánsvexti á íbúðabréfum úr 4,65 prósentum í 4,85 prósent í kjölfar útboðs á íbúðabréfum. Hækkunin tekur gildi á morgun.

Alls bárust tilboð að nafnvirði 8,4 milljarðar króna í 2. áfanga útboðsins á árinu og var ákveðið var að taka tilboðum í íbúðabréf að nafnvirði 3,7 milljarðar króna. Vegin heildarávöxtunarkrafa tekinna tilboða í útboðinu með þóknun er 4,33 prósent.

Vaxtaákvörðun Íbúðalánasjóðs byggir því á ávöxtunarkröfu í útboði íbúðabréfa sem haldið var 31. mars, ásamt vegnum fjármagnskostnaði uppgreiðslna ÍLS-veðbréfa. Vegnir vextir í útboði íbúðabréfa og uppgreiddra ÍLS-veðbréfa er 4,27 prósent. Vaxtaálag vegna rekstrar, 0,15 prósent, varasjóðs, 0,20 prósenta, og uppgreiðsluáhættu, 0,25 prósent, samtals 0,60 prósent.

Með reglugerð er Íbúðalánasjóði heimilt að bjóða viðskiptavinum sínum að taka íbúðalán með því að greiða sérstakt uppgreiðsluálag. Stjórn Íbúðalánasjóðs hefur því ákveðið að bjóða viðskiptavinum sjóðsins einnig að taka íbúðalán með sérstöku uppgreiðsluálagi. Verða slík íbúðalán boðin með 0,25 prósenta lægri vöxtum en vextir hefðbundinna lána, þ.e. 4,60 prósent.