Rekstrartekjur Hitaveitu Suðurnesja (HS) námu 4,68 milljörðum króna á síðasta ári og er það 873 milljóna króna aukning frá 2004, að því er fram kemur í ársuppgjöri fyrirtækisins fyrir síðasta ár. Um 23% hækkun tekna stafar af aukningu í raforkusölu um 545 milljónir króna og aukningu í öðrum tekjum um 261 milljón krónur.
Rekstrargjöld án afskrifta námu 2,4 milljörðum króna en voru rúmar 2,3 milljarðar króna árið áður. Hækkun rekstrargjalda um 81 milljón króna er aðallega vegna aukningar á kostnaði við raforku og raforkuflutning um 215 milljón krónur.
Þá nam hagnaður HS tæpum 1,6 milljörðum króna á síðasta ári en hann var 880 milljónir króna árið 2004.
Samkvæmt efnahagsreikningi eru eignir HS hf. bókfærðar á 24,6 milljarða króna, þar af eru veltufjármunir 1,9 milljarðar króna. Eignir hækkuðu um 6,6 milljarða frá fyrra ári. Aukningin er aðallega vegna fjárfestinga HS í Reykjanesvirkjun, sem námu 6,1 milljarði á árinu.
Skuldir HS hf. nema samkvæmt efnahagsreikningi 10,8 milljörðum króna, þar af eru skammtímaskuldir 2,7 milljarðar króna. Skuldir hafa hækkað um 5,4 milljarða króna á milli ára, að því er fram kemur í tilkynningu til Kauphallarinnar. Hækkunin skýrist af lántökum HS vegna Reykjanesvirkjunar.
Eigið fé HS hf. var lækkað um 329 milljónir króna í ársbyrjun vegna leiðréttingar á lífeyrisskuldbindingu sem hvílir á félaginu og var eiginfjárhlutfall síðasta árs 56%, að því er fram kemur í tilkynningunni.
Þá segir að rekstrarhorfur séu góðar á árinu, umsvif fari vaxandi og fjárfestingar miklar. Áfram verði mikil uppbygging kerfa samfara aukningu byggðar á þjónustusvæði fyrirtækisins og aukinni orkuvinnslu. Unnið verður að rannsóknum á frekari virkjunarkostum til framtíðar og er verið að afla rannsóknarleyfa í því skyni. Stærstu einstöku verkefnin eru lok framkvæmda við Reykjanesvirkjun og síðan framkvæmir við orkuver 6 í Svartsengi sem er 30 MW og verður gangsett fyrir árslok 2007. Með þessum orkuverum eykst raforkuframleiðsla fyrirtækisins úr 45 MW í 175 MW.
Tekjur Hitaveitu Suðurnesja jukust milli ára
