Wal-Mart braut á starfsfólki

Bandaríska verslanakeðjan Wal-Mart, sem er ein sú stærsta í heimi, hefur verið dæmd til að greiða fyrrum starfsfólki sínu að minnsta kosti 78 milljónir bandaríkjadala, jafnvirði rúmra 5,3 milljarða íslenskra króna, í skaðabætur. Starfsfólkið var þvingað til að vinna í frítíma sínum, svo sem í kaffi- og matarhléum, án þess að fá greitt fyrir það.

Málið var tekið fyrir í Pennsylvaníuríki í Bandaríkjunum og í niðurstöðu dómsins sagði, að fyrirtækið hefði brotið ríkislög með því að neita að greiða starfsfólkinu fyrir aukavinnuna.

Það voru hvorki fleiri né færri en 187.000 fyrrum starfsmenn Wal-Mart, sem unnu hjá fyrirtækinu frá því í mars árið 1997 til maí á þessu ári sem kærðu fyrirtækið. Fyrrum starfsmaður fyrirtækisins, sem fór fyrir fyrrum samstarfsfólki sínu í málinu, sagði fyrir réttinum að hún hefði unnið í matar- og kaffihléum og jafnvel eftir lokunartíma án þess að fá nokkuð greitt fyrir. Reiknaðist henni til að hún hefði unnið um 8 til 12 klukkustundir án þess að fá borgað fyrir það í hverjum mánuði.

Svipað mál kom upp í Kaliforníuríki í Bandaríkjunum í desember í fyrra en þá dæmdi dómari Wal-Mart til að greiða 116.000 fyrrum starfsmönnum fyrirtækisins 172 milljónir dala, jafnvirði tæpra 11,8 milljarða íslenskra króna, í bætur fyrir að neita þeim um matarhlé.