Krónan muni ekki brotlenda

Greiningardeild Landsbankans spáir áframhaldandi hagvexti og segir að gengi krónunnar lækki mjúklega án brotlendingar. Spá bankans, sem var kynnt á morgunverðarfundi í morgun, er mun bjartsýnni en spá Íslandsbanka. Björn Rúnar Guðmundsson, sérfræðingur í þjóðhagfræði á greiningardeild Landsbankans, segir að spá hafi verið birt fyrir tímabilið 2005-2010 og þar sé spáð miklum áframhaldandi hagvexti á næsta ári og verulegum á þessu ári. Á árinu 2007 fari hins vegar að hægjast um og fjárfestingar dragist saman ásamt einkaneyslu. Þau miklu umsvif sem verið hafa á undanförnum árum muni minnka tiltölulega hratt.