Hive kvartar yfir fjarskiptarisum

Fjarskiptafyrirtækið Hive hefur sent inn kvörtun til Samkeppniseftirlitsins þar sem fyrirtækið telur að Síminn og Og Vodafone tvinni saman á óeðlilegan og samkeppnishindrandi hátt fjarskipta- og sjónvarpsþjónustu og brjóti þar með gegn gildandi úrskurði samkeppnisyfirvalda varðandi samruna fjarskipta og sjónvarps. Í tilkynningu frá Hive kemur fram að félagið telji það ábyrgðaratriði að hálfu Samkeppniseftirlitsins að það gæti að hagsmunum allra aðila sem starfa á fjarskiptamarkaði og tryggi jafna samkeppnisaðstöðu. Ef slíkt sé ekki gert sé Samkeppniseftirlitið í raun að viðurkenna að á íslenska fjarskiptamarkaðinu sé stjórnað af tvemur aðilum sem skipti markaðinum á milli sín. Þetta hafi þegar leitt til hækkunar á verði fjarskiptaþjónustu til landsmanna og sú þróun sé líkleg til að halda áfram nema Samkeppniseftirlitið grípi inn í þessa atburðarrás. Þá telur Hive viðskiptahætti Símans í tengslum við Enska boltann mjög vafasama og einkennast af einokunartilburðum. Síminn geri þá kröfu til þeirra sem vilji kaupa áskrift að Enska boltanum að þeir kaupi einnig alls óskylda vöru, þ.e. ADSL-þjónustu. Í ofanálag geri Síminn kröfu um að viðskiptavinir geri 12 mánaða samning um ADSL-þjónustuna, annars geti þeir ekki fengið sjónvarpsþjónustuna. Einnig vill Hive með kvörtun sinni til Samkeppniseftitlitsins vekja athygli yfirvalda á því hátterni sem ríkt hafi um skeið, að ef annar tveggja fjarskiptarisanna brjóti samkeppnislög telji hinn aðlinn sig í rétti til að gera slíkt hið sama. Í þessu sambandi bendir Hive á að Og Vodafone bjóði nú sérstakan afslátt af Sýn ef fólk kaupi ADSL-þjónustu hjá Og Vodafone. Þá segir í tilkynnningu Hive að ef slíkt hátterni líðist muni það leiða til lögleysu og stórkostlegrar afturfarar fyrir íslenskt viðskiptalíf. Hive telji það hagsmunamál allra Íslendinga að Samkeppniseftirlitið grípi inn í og stöðvi þessa þróun samstundis.