Fimmtíu milljarða samdráttur

Lán Íbúðalánasjóðs, sem er stærsti lánveitandi hér á landi til fasteignakaupa, voru í árslok 2003 tæpir 445 milljarðar. Í lok júní 2004 höfðu útlánin hækkað upp í tæpa 483 milljarða. Eftir að árshlutaskýrsla Íbúðalánasjóðs kom út fóru bankarnir að bjóða upp á fasteignalán og var nokkur uppgreiðsla á Íbúðasjóðslánum á haustmánuðum, sérstaklega í október og nóvember á síðasta ári. Samkvæmt tölum sem Fréttablaðið hefur undir höndum minnkuðu heildarútlán sjóðsins um allt að 50 milljarða á síðustu sex mánuðum ársins 2004. Hlutdeild viðskiptabankanna á fasteignalánamarkaði hefur aukist úr fimm prósentum í tæp 19 prósent á síðustu tveimur árum. Þrátt fyrir það hefur Íbúðalánasjóður enn yfirburðastöðu á fasteignalánamarkaði með um 67 prósent af fasteignalánum, en hefur þó minnkað um tíu prósentustig á umræddum tíma. Hlutfall lífeyrissjóða hefur verið um 17 prósent en er nú 14 prósent. Hallur Magnússon hjá Íbúðalánasjóði segir að útlán í janúarmánuði hafi verið hærri en í janúar fyrir ári síðan, sem þó hafi verið metár, og það sé hans tilfinning að um helmingur nýrra lána til fasteignakaupa komi frá sjóðnum en bankarnir skipti hinum helmingnum á milli sín. Í lok janúar voru fasteignalán bankanna tæpir 138 milljarðar, að sögn Eddu Rósar Karlsdóttur, yfirmanns Greiningardeildar Landsbankans. Þessi lán höfðu þá hækkað um 12,5 milljarða frá áramótum. Hluti þessara lána hefur orðið til vegna skuldbreytinga. Ekki er gert ráð fyrir erlendum lánum heimilanna í þessari tölu. Útlán lífeyrissjóðanna eru nú um 90 milljarðar.