Hærri vextir á sumarhúsalánum

Vextir á lánum til kaupa á sumarhúsum eru hærri en á lánum til annarra fasteignaviðskipta. Útibússtjóri Landsbankans segir óeðlilegt að slík lán njóti sömu kjara og lán til íbúðarkaupa. Ekkert hefur dregið úr byggingu nýrra sumarbústaða þrátt fyrir stóraukna fjárfestingu í íbúðarhúsnæði og að vextir af lánum til sumarbústaða séu talsvert hærri en af lánum til íbúðarhúsnæðis. Verð á notuðum sumarbústöðum hafa þó ekki hækkað jafn ört og á íbúðarhúsnæði, að minnsta kosti húsnæði á höfuðborgarsvæðinu, sem bendir til þess að þessi markaður sé í meira jafnvægi. Bankarnir hafa verið að lána á vöxtum frá 4,90 prósentum til bústaðabygginga, sem eru talsvert hærri vextir en til íbúðakaupa, og ekki er lánað meira en 60 prósent af kaupverði, eða byggingarkostnaði. Að sögn Kristins Bjarnasonar hjá Frjálsa fjárfestingabankanum stafar þessi munur ekki síst af því að eigendum sumarhúsa er ekki skylt að tryggja sig gegn vatnstjónum, eins og brunatjónum, en vatnstjón eru algeng tjón í sumarhúsum. Þá eru leigulóðarsamningar í sumum tilvikum ekki langt fram í tímann og loks er hægt að flytja sumarbústaði af sökklum sínum, eða stela veðinu, ef svo má segja, þótt ekki hafi enn komið til þess, að sögn Kristins. Ekki eru allir sáttir við að vextir af sumarhúsalánum séu hærri en þegar um íbúðir er að ræða. Árni Emilsson, útibússtjóri Landsbankans í Austurstræti, segir ekki eðlilegt að sumarhúsavextir fari niður í 4,15 prósent. Það sé aðeins þegar um sé að ræða mjög seljanlegar eignir með stærra kaupendahóp. Mun færri hafi ráð á því að kaupa sér sumarhús og því eðlilegt að hærri vextir séu á slíkum lánum. Árni vill þó ekkert útiloka. Hann segir samkeppni bankanna mikla og ekki óhugsandi að bankarnir fari að berjast á þessum markaði eins og öðrum.