Sprungur á Norðlingaholti

Ein af stóru jarðskjálftasprungunum, sem ganga í gegnum Rauðavatn og Norðlingaholt, er nú vel sýnileg. Hún er það breið að nær væri að kalla gjá. Lægðin í landslaginu upp af Rauðavatni norðaustanverðu er í raun ein sprungan. Hún liggur síðan undir Suðurlandsveginn og áfram í gegnum nýbyggingasvæðið á Norðlingaholti. Við götuna Norðlingavað er búið að grafa stóran skurð þvert á sprunguna og má þar nú sjá móta fyrir misgenginu. Athyglisvert er að sjá hversu breitt misgengið er en þarna virðast vera um átta metrar á milli klapparveggja. Þetta er ein af nokkrum sprungum sem liggja í gegnum nýbyggingarsvæðið á Norðlingaholti. Þegar svæðið var skipulagt voru hús upphaflega teiknuð ofan á sumum sprungunum og hefur síðan þurft að færa nokkur þeirra til á teikningunni. Sprungurnar eru ekki alveg lausar við mannvirki því til að nýta landið sem best hafa holræsaskurðir verið lagðir eftir þeim auk þess sem götur liggja yfir þeim.