Spá launaskriði og verðbólgu

Atvinnuleysi mældist aðeins tvö prósent í júlímánuði og hefur ekki mælst minna frá því í desember árið 2001. Bankarnir spá launaskriði og verðbólgu. Ingólfur Bender, forstöðumaður greiningardeildar Íslandsbanka, segir spennu á innlendum vinnumarkaði mikla og allt bendi til að verðbólga verði meiri hér á landi en í viðskiptalöndunum í kringum okkur. Ingólfur spáir því að verðbólgan verði umfram það sem telst vera stöðugt verðlag og segir hann að búast megi við að hún muni draga úr auknum kaupmætti sem myndast hefur, en kaupmáttur hefur aukist um rúm 3 prósent síðasta árið, mest á almennum markaði. Þá hafa laun hækkað um 6,6 prósent frá því í júlí í fyrra. Laun hækkuðu meira á almennum markaði en hjá hinu opinbera, eða um rúmlega 6,8 prósent á meðan hækkunin var 6,1 prósent hjá hinu opinbera. Hækkanir stafa að stærstum hluta af samningsbundnum launahækkunum. Á þessu sama 12 mánaða tímabili var verðbólga um 3,5 prósent sem þýðir að hrein kaupmáttaraukning hefur verið 3,1 prósent síðasta árið. Ingólfur segir það vissulega jákvætt að fólk hafi vinnu. Hins vegar fylgi litlu atvinnuleysi ákveðin hætta á að hagkerfið ofhitni með tilheyrandi launaskriði og verðbólgu í kjölfarið og það sjái bankarnir fyrir sér að gerist á næstu árum.