Prófanir hjartalyfs jákvæðar

Íslensk erfðagreining greindi í morgun frá jákvæðum niðurstöðum prófana á hjartalyfinu DG031. Í tilkynningu segir að lyfjaprófanir sýni að lyfið hafi marktæk áhrif á áhættuþætti hjartaáfalls og veldur ekki aukaverkunum. Markmið rannsóknanna var að kanna áhrif mismunandi skammtastærðar DG031 á ýmsa áhættuþætti hjartaáfalls. Niðurstöðurnar sýna að lyfið hefur tilætlaða virkni á fleiri en einn áhættuþátt hjartaáfalls. Allar skammtastærðir lyfsins sem prófaðar voru minnkuðu styrk bólguvakans LTB4 (leukotriene B4) sem er lokaafurð þess líffræðilega ferils sem erfðarannsóknir Íslenskrar erfðagreiningar hafa sýnt að tengist aukinni hættu á hjartaáfalli. Mesta skammtastærð lyfsins sem prófuð var minnkaði einnig styrk MPO (myeloperoxidase), en hár styrkur þess ensíms hefur verið tengdur aukinni hættu á hjartaáfalli í óskyldum rannsóknum. Áhrifin á báða þessa áhættuþætti voru háð skammtastærð DG031. Ennfremur kom í ljós að mesta skammtastærðin minnkaði styrk bólguvakans sICAM-I, sem er mikilvægt boðefni við virkjun bólgusvars og frumuíferðar. Engar alvarlegar aukaverkanir af völdum lyfsins komu í ljós í lyfjaprófununum. Í tilkynningu ÍE segir meðal annars orðrétt: „Niðurstöður erfðarannsókna okkar á hjartaáfalli gáfu til kynna að myndun bólguvakans LTB4 væri lykilatriði í breytingum í æðum sem leiða til hjartaáfalls. DG031 var hannað til að hindra virkni FLAP ensímsins sem stjórnar myndun þessa bólguvaka. Niðurstöður þessara lyfjaprófana lofa góðu því þær sýna að DG031 hefur ekki einungis áhrif á myndun LTB4 heldur einnig á styrk MPO sem aðrar rannsóknir hafa sýnt að hefur spágildi varðandi hættu á hjartaáfalli," sagði Kári Stefánsson, forstjóri Íslenskrar erfðagreiningar. "Sú staðreynd að DG031 hefur áhrif á MPO segir okkur að við getum notað mælingar á styrk þessa ensíms til að meta á óbeinan hátt hverjir séu í aukinni hættu á að fá hjartaáfall vegna breytileika í myndunarferli LTB4. Slíkur óbeinn mælikvarði mun auðvelda okkur áframhaldandi prófanir á lyfinu í fasa III. Markmið þeirra rannsókna verður að kanna hvort lyfið fækki hjartaáföllum í hópi þátttakenda.“ Skipulag lyfjaprófananna Markmið lyfjaprófananna var að kanna áhrif mismunandi skammtastærða DG031 á ýmsa bólguþætti sem tengdir hafa verið hjartaáföllum. Í grein sem birtist í hinu virta vísindatímariti Nature genetics fyrr á árinu lýstu vísindamenn Íslenskrar erfðagreiningar algengum breytileika í erfðavísi sem kemur að myndun LTB4 bólguvakans og tengist aukinni hættu á hjartaáfalli. Líklegt er talið að aukin áhætta stafi af bólgum í æðum við æðaskellur. DG031 var þróað til að hindra virkni FLAP (5-lipooxygenase activating protein) sem kemur að stjórnun á myndun leukotriene boðefna. Virkni mismunandi skammta lyfsins var prófuð í 172 Íslendingum og borin saman við lyfleysu. Prófanirnar voru bæði tvíblindar og víxlaðar, þ.e. hluta meðferðartímans fengu þátttakendur lyf og jafnlangan hluta hennar lyfleysu, en hvorki þátttakendur né stjórnendur rannsóknarinnar vissu fyrirfram hvort lyfið eða lyfleysan voru tekin á undan. Þátttakendur í lyfjaprófununum voru einstaklingar sem hafa fengið hjartaáfall eða kransæðastíflu og eru með einn eða fleiri erfðaþætti sem vísindamenn Íslenskrar erfðagreiningar hafa tengt við hjartaáfall. Fyrstu fjórar vikurnar fékk helmingur þátttakenda eina af þremur mismunandi skammtastærðum af DG031, þ.e. eina, tvær eða þrjár 250 mg töflur á dag. Hinn helmingur hópsins tók lyfleysu á sama tíma. Eftir hálfsmánaðar hlé var prófununum víxlað á þann hátt að hópurinn sem í upphafi tók lyfleysu fékk mismunandi skammtastærðir DG031 og hópurinn sem upphaflega byrjaði á lyfinu fékk lyfleysu.  Mat á aukaverkunum Engar alvarlegar aukaverkanir komu í ljós í lyfjaprófununum. Enginn munur sást heldur á starfsemi lifrar hjá þeim sem tóku lyfið miðað við lyfleysu. Einn þátttakandi fékk hjartaáfall á þeim tíma sem hann tók inn DG031 og einn þátttakandi lést á þeim tíma sem hann fékk lyfleysu. Algengasta aukaverkunin sem þátttakendur lýstu var vægur svimi sem kom fram hjá sex þátttakendum á meðan þeir voru á virkri lyfjameðferð. DG031 er lítil lyfjasameind sem hindrar virkni FLAP og var upprunalega þróuð af þýska lyfjafyrirtækinu Bayer AG. Íslensk erfðagreining öðlaðist nýtingarrétt á DG031 í nóvember 2003 og skráning Bayer á lyfinu var færð til Íslenskar erfðagreiningar í desember sama ár.  Íslensk erfðagreining áætlar að kynna ítarlegar niðurstöður úr rannsókninni á vísindaráðstefnu innan skamms, auk þess sem þær verða birtar í vísindagrein.  Vísindamenn Íslenskrar erfðagreiningar munu ræða niðurstöður lyfjaprófananna á símafundi sem sendur verður út í beinni útsendingu á heimasíðu Íslenskrar erfðagreiningar (www.decode.is) í dag kl. 15. Einnig verður hægt að hlusta á upptöku frá fundinum í síma +1 320 365 3844 frá klukkan 18:30 í dag til þriðjudagsins 26. október. Aðgangskóðinn að upptökunni er 751668.