Bjartsýnin meiri án fjölmiðlamáls

Væntingavísitala Gallups hækkaði í júlí eftir samfellda lækkun frá í mars. Væntingavísitalan mælist nú 115,6 stig, en bjartsýnin reis hæst í mars þegar vísitalan mældist tæp 133 stig. Lækkun vísitölunnar síðustu mánuði á undan skýrðist af aukinni svartsýni um efnahags og atvinnuástand að sex mánuðum liðnum. Nú horfa fleiri til betri tíðar. Greining Íslandsbanka veltir fyrir sér ástæðum breytinganna nú. Krónan hafi styrkst að undanförnu, en sterk fylgni virðist milli gengisþróunar og væntinga. Styrking krónu eykur bjartsýni. Þá er á það bent að verðbólga hjaðnaði milli júní og júlí. Þessir þættir eru að mati greiningardeildarinnar til þess fallnir að auka bjartsýni. Greining Íslandsbanka telur hins vegar að pólitísk óvissa í kringum fjölmiðlamál hafi verið neikvæð fyrir bjartsýni þjóðarinnar. Af því má draga þá ályktun að bjartsýnin hefði vaxið meira ef hefðbundins frís frá stjórnmálum hefði notið við.