Kjörsókn mun minni en 1996

Kjörsókn nú er mun minni en í forsetakosningunum árið 1996 og í alþingiskosningunum í fyrra. Framkvæmd kosninganna hefur víðast hvar gengið mjög vel. Slæmt veður gæti þó sett strik í reikninginn í Suðurkjördæmi, því ekki hefur verið hægt að fljúga með atkvæði frá Vestmannaeyjum og útlitið fyrir kvöldið er slæmt. Tvennar sameiningarkosningar fara fram samhliða forsetakosningunum. Kjörstaðir voru opnaðir klukkan níu í morgun og verður þeim lokað á flestum stöðum klukkan tíu í kvöld. Strax í morgun varð ljóst að kosningaþátttaka var heldur minni en í forsetakosningunum árið 1996 og í alþingiskosningunum í fyrra. Fáir virtust taka daginn kjördaginn snemma, en heldur lifnaði við þegar líða fór á daginn. Samhliða forsetakosningunum er kosið um sameiningu sveitarfélaga á tveimur stöðum á landinu. Akureyringar og íbúar í Hrísey greiða atkvæði um hvort sameina eigi sveitarfélögin og enn fremur er kosið um að sameina Austur-Hérað, Norður-Hérað, Fljótsdalshérað og Fellahrepp. Síðdegis í dag var kjörsóknin 36,3 % í Reykjavíkurkjördæmi Suður, sem er um 10 % minni þátttaka en í kosningunum árið 1996. Í Reykjavíkurkjördæmi norður var kjörsóknin 35,5 %. Í norðvesturkjördæmi var þátttakan síðdegis í dag 44%, og í norðausturkjördæmi 39,3%. Í suðurkjördæmi var þátttakan nú rétt fyrir fréttir um 23,9% og í suðvesturkjördæmi var hún 35,9%, en í þingkosningum í fyrra var kjörsóknin þar á sama tíma um 52%. Vont veður gæti sett verulegt strik í reikninginn í suðurkjördæmi því ekkert hefur verið hægt að fljúga frá Vestmannaeyjum upp á landi í dag og útlitið fyrir kvöldið er ekki gott, auk þess sem sjólag er með versta móti. Samkvæmt lögum væri þó hægt að skipa svokallaða umdæmiskjörstjórn í eyjum til að telja atkvæðin. Að öðru leyti hefur framkvæmd forsetakosninganna gengið mjög vel víðast hvar.