Fólk dregið í dilka í um­ræðum launa- og kjara­mála

Jú, staðreyndin er þessi:

Auðvitað hefur það verið rannsakað víða hvaða áhrif það hefur á fólk og vinnustaði þegar umræðan beinist að launum og kjarabaráttu. Oft snýst þetta nefnilega um dýpri upplifun fólks á félagslegu réttlæti og sanngirni.

Rannsóknir sem Harvard Business Review (HBR) hefur fjallað um koma einmitt inn á hugtök sem á ensku kallast Distributive & procedural justice - sem þýða má sem úthlutunar- og ferlisréttlæti. Þau skýra út það sem gerist þegar svona umræða fer af stað – líkt og verið hefur í vikunni – því þá förum við ósjálfrátt að bera okkur saman við aðra og spyrja:

Af hverju eru þeir að krefjast meira á meðan við sitjum eftir?

Eða öfugt:

Hvers virði er sérhæfing, mikil ábyrgð og langskólanám?

Áhrifin á vinnustaði geta meðal annars speglast í ákveðnu vonleysi eða minnkaðri helgun í starfi. Fólk getur farið að upplifa eigið vinnuframlag vanmetið í stóra samhenginu.

Bæði Financial Times og MIT Sloan Management Review hafa fjallað um hvernig heitar samfélagsumræður geta smitast inn á vinnustaði og skapað spennu eða smá átök:

Fólk er dregið í dilka: Sumir styðja verkfallsréttinn skilyrðislaust á meðan aðrir líta á aðgerðirnar sem ógn við efnahagslegan stöðugleika. 

Þegar andrúmsloftið verður þrungið dregur gjarnan úr sálfræðilegu öryggi. 

Margir veigra sér við að tjá sig eða finna fyrir pirringi gagnvart samstarfsfólki.

Í umfjöllun BBC Worklife hefur síðan verið rætt um hvernig stöðugt fréttaflæði og hávær samfélagsumræða geti leitt til hneykslunarþreytu (e. outrage fatigue): Við verðum einfaldlega úrvinda á stöðugum deilum.

Þrenn góð ráð til að sporna við þessu:

1. Stjórnaðu þínu eigin hugarfari

Það er eðlilegt að efast og hafa skoðanir. En að festa sig í gremju yfir kjörum eða aðgerðum annarra stétta tekur frá okkur dýrmæta orku án þess að skila nokkru til baka. Setjum frekar orkuna í okkar eigið virði, starfsánægju og starfsþróun.

2. Kaffistofan er ekki kommentakerfi

Eðlilega erum við ólík sem vinnum saman. En vinnustaðurinn okkar og kaffistofan eiga að vera samvinnusvæði, ekki vettvangur fyrir heiftarlegar deilur. Virðum ólík sjónarmið og gætum þess að heitar umræður um samfélagsmál grafi ekki undan daglegu trausti og samvinnu.

3. Stjórnendur – viðurkennið andrúmsloftið

Gott ráð fyrir leiðtoga: Þegar óvissa ríkir í samfélaginu – hvort sem um er að ræða yfirvofandi verkföll, verðbólgu eða kjaradeilur – er mikilvægt að sýna aukið gagnsæi, hlusta á áhyggjur starfsfólks og viðhalda ró, án þess þó að taka pólitíska afstöðu.