Ó­sáttur við skjal Samkeppniseftirlitsins: „Mér finnst þetta bara ó­fag­legt“

Þetta kom fram í kvöldfréttum Sýnar.

Í þessu skjali kemur fram að álagning á dísilolíu hafi frá árinu 2022 hækkað um fimmtíu prósent að raunvirði en álagning á bensínlítrann hækkað um 25% að raunvirði á sama tímabili, og að olíufélög hafi hækkað verðið dagana fyrir gildistöku virðisaukaskattslækkunar á eldsneyti. Í tilkynningu frá eftitlitinu sem send var út í morgun sagði að að verðmunur á Íslandi og öðrum Evrópuríkjum hafi aukist á síðustu árum, og að vísbendingar væru um að þegjandi samhæfing á eldsneytismarkaði væri að eiga sér stað.

Benedikt segir þetta í annað skiptið á skömmum tíma sem Samkeppniseftirlitið birti slíkt skjal án þess að leita skýringa. Fyrra skiptið varðaði umræðuskjal um dagvöruverslanir.

„Það sem okkur þykir vanta í myndina, og við höfum áhyggjur af, er að þetta er í annað skiptið sem eftirlitið birtir slík skjöl þar sem önnur hliðin er sýnd. Það er að segja, verðhliðin. Það er hins vegar ekkert gert í því að horfa í þá hlið hvort það séu einhverjar skýringar á bak við þetta, einhverjar rökréttar ástæður að baki þessu,“ segir Benedikt.

Hann nefnir að í lok skjalsins um eldsneytismarkaðinn sé talað um að ef til vill eigi stjórnvöld að bregðast við, og jafnvel að eftirlitið muni sekta þessa aðila á olíumarkaði. Hann segir það mjög sérstakt.

„Við höfum litið svo á að Samkeppniseftirlitinu beri að gæta að hlutleysi,“ segir Benedikt og nefnir til samanburðar álíka sænskt skjal sem hann las á dögunum.

„Þá sér maður að menn eru að leita skýringa í þessum skjölum, og ef það er óvissa uppi þá er vakin athygli á því og jafnvel settar fram ágiskanir um það hverjar skýringarnar gætu verið. En hér er þetta, verð ég að segja, einhliða í ákveðna átt,“ segir hann.

„Heildarsamhengið er að það eru settar fram verulegar ávirðingar, að því er virðist jafnvel undir hótunum um viðurlög, án þess að fyrirliggjandi sé einhver fullnægjandi rannsókn á því hvað er um að vera.“

Benedikt segir að það sem honum finnist sérstakt í málinu sé að Samkeppniseftirlitið hafi samkvæmt hans vitund verið að kalla eftir gögnum og ætti því að hafa mikið af þeim undir höndum. „Það getur verið að þeim hafi ekki unnist tími til að ljúka skoðun á þeim, en þá veltir maður fyrir sér: Af hverju þessi tímapunktur? Að gefa þetta út með þessum ávirðingum ef þú getur ekki útilokað að það séu einverjar afsökunarástæður þarna að baki?

Finnst þér að olíufélögunum vegið?

„Mér finnst þetta bara ófaglegt. Mér finnst það bara mjög sérstakt að opinbert stjórnvald, sérstök stofnun sem á að gæta hlutleysis, gangi fram með þessum hætti, og beinlínis segi að allar vísbendingar eru um að einhver hafi gert eitthvað af sér, en tekur á sama tíma fram að þeir séu ekki búnir að skoða málið.“