Stefna að því að opna deiliþjónustu bílferða fljót­lega

Þar sem fólk getur tengst saman til þess að samnýta ferðir og deila kostnaði. Hvort sem er innan Reykjavíkur, austur fyrir fjall eða á Keflavíkurflugvöll.

Enda þörfin svo sannarlega til staðar, segja þeir Ahmad Iftikhar Khan, Moses Osabutey og Anoop A Nair, stofnendur HuddleHop.

„Á Facebook eru nú þegar fullt af hópum sem eru að sinna þessari þjónustu. Fólk að leita eftir fari hjá hvort öðru. Samtals eru um fjörtíu þúsund manns í þessum Facebook grúppum,“ segir Anoop.

„Það er hins vegar ekki nógu skilvirkt að treysta á þetta á Facebook. Því þar getur til dæmis einhver boðið upp á ferð, en er síðan upptekin og sér ekki þegar áhugasamur lætur vita af sér og svo framvegis,“ segir Ahmad.

„Markhópurinn fyrir svona deiliþjónstu er líka mjög stór. Árið 2025 er til dæmis áætlað að um 2,2 milljónir ferðamanna muni heimsækja Ísland,“ segir Moses.

Í gær og í dag segir Atvinnulífið frá fyrirtækjum sem tóku þátt í Hringiðu+ viðskiptahraðli KLAKS í vor, sem beinir sjónunum að nýjum grænum lausnum.

Öðruvísi reglur á Íslandi

Félagarnir þrír segja þjónustu svipaða og HuddleHop svo sem þekkta víða erlendis.

Í Evrópu þekkja til dæmis margir fyrirtækið Blabla cars, þar sem fólk getur í gegnum app og vefsíður tengt sig við annað fólk sem er að fara sömu leið; Bókað sig saman í ferð og deilt kostnaði. Þjónustulaun Blabla cars nema frá 18-21% sem fólk þarf þá að gera ráð fyrir til viðbótar við kostnað vegna bílsins. Blabla cars rekur líka rútuþjónustu á sumum stöðum.

Í Danmörku er ágætlega þekkt fyrirtæki sem heitir GoMore og gengur líka út á að fólk deili bifreiðum. Þó aðeins öðruvísi módel því hjá GoMore leigir fólk einkabíl til afnota af öðru fólki á vægu verði.

Félagarnir segja leikreglurnar á Íslandi þó vera þess eðlis að hvorugt þessara fyrirtækja gætu starfað hér.

„Mér skilst að samgöngulögin á Íslandi séu þannig að einstaklingar mega ekki hagnast beint af deiliþjónustu eins og þessari. Sem þýðir að eitt af því sem við þurftum að hugsa og útfæra fyrir HuddleHop er tekjulíkan sem er ólíkt því sem þekkist erlendis,“ segir Moses.

„Þar erum við bæði að horfa til auglýsingatekna því til Íslands koma rúmlega tvær milljónir ferðamanna á ári,“ segir Moses og vísar þar til ferðamannafjöldans sem áætlaður er til Íslands aðeins á þessu ári.

„En við erum líka að hugsa um áskriftartekjur af premium útgáfu appsins.“

„Allt gengur þetta þó út á það sama: Fólk vill auðvelda sér leiðina á milli staða með því að deila bílum. Umferðin í Reykjavík er til dæmis þannig að oft getur verið mjög erfitt að komast á milli staða því traffíkin er einfaldlega svo mikil,“ segir Ahmad en bætir við:

En við erum ekki bara að horfa á deiliþjónustu á höfuðborgarsvæðið heldur einnig að fólk nýti sér deiliþjónustuna fyrir lengri ferðir. 

Daglega fara til dæmis um 40 þúsund bílar á milli Reykjavíkur og Keflavíkur. 

Það gæti heilmikið sparast við það að deila bílunum þar á milli í meira mæli.“

Svo ekki sé talað um umhverfisáhrifin.

Kynntust í háskólanum

Saga félaganna er reyndar skemmtileg saga líka. Því allir koma þeir frá sitthvoru heimalandinu en kynntust í Háskóla Íslands.

„Við þekktumst ekki en sátum nokkra kúrsa saman og vorum oft í sömu hópum, fórum því smátt og smátt að kynnast hvor öðrum og komumst þá meðal annars af því að við erum allir hugbúnaðarverkfræðingar sem höfum mjög gaman af því að forrita,“ segir Ahmad.

Anoop er sá sem hefur verið á Íslandi lengst; Kom hingað í rannsóknarverkefni fyrir doktorsnámið sitt. Moses hefur verið hér í um tvö ár og Ahmad skemur en eitt ár.

Það sem leiddi þá síðan saman að hugmyndinni um HuddleHop var hakkaþon sem haldið var í HÍ.

„Það eru svo margir námsmenn í vandræðum með að koma sér á milli staða og í byrjun vorum við því að hugsa um hvernig hægt væri að leysa úr því,“ segir Anoop en bætir við:

„Síðan komumst við inn í Gulleggið þar sem hugmyndin að HuddleHop þróaðist enn meir. Að taka þátt í Gullegginu var mikil hvatning. Síðar tókum við þátt í Hringiðu+ hraðlinum hjá KLAK en allt hefur þetta gerst á fjórum mánuðum.“

Að taka þátt í svona viðskiptahraðli eins og Hringiðu segja strákarnir að hafi gefist þeim mjög vel.

„Lögfræðiþjónusta er til dæmis mjög dýr en í gegnum Hringiðu fengum við aðgang að slíkri þjónustu, sem við þurftum einmitt á að halda til þess að vera vissir um að starfsemi HuddleHop yrði örugglega í samræmi við íslensk lög,“ segir Anoop.

Appið og vefsíðan er nánast tilbúin og nú þegar komin í prófanir hjá nokkrum notendum. Næstu skref er að finna fjárfesta og segja félagarnir að sú vinna sé nú þegar hafin.

„Við vonumst þó til þess að HuddleHop verði komið í gagnið á þessu ári,“ segir Moses.

En hvað með upplýsingar fyrir notendur; Til dæmis um bílstjóra eða samferðarmenn sem fólk er að bóka sig með í ferðir, hvernig bíllinn er eða hvort bíllinn sé undirbúinn undir snjó og slyddu austur fyrir fjall og svo framvegis?

Jú svara félagarnir; Fyrst er að koma HuddleHop í gagnið en um leið og fólk fer að nota það í meira mæli gefst því kostur á að gefa umsagnir og endurgjöf með einkunnargjöf (e. ratings).

En hvernig ætlið þið að fá fólk til að skrá sig sem bílaeigendur sem bjóða upp á far?

„Við munum byrja á því að leita til þeirra sem eru nú þegar á Facebook því þetta eru svo margir sem eru í þeim hópum. Að gera það sama í gegnum HuddleHop verður miklu notendavænna og minni hætta á að tilkynningar eða samskiptaboð berist ekki á milli fólks,“ svarar Ahmad.

Er þetta meira yngra fólk en eldra fólk sem vill svona þjónustu eða hver er markhópurinn?

„Hann er mjög fjölbreyttur. Námsmenn og skiptinemar leitast mikið í þetta en eins líka eldra fólk sem er til dæmis að keyra lengri ferðir og finnst gaman að fá félagsskap í bílinn,“ svarar Moses.

Sjáið þið fyrir ykkur að HuddleHop stækki og vaxi út fyrir landsteinana?

„Já,“ svara félagarnir ákveðið.

„Við byrjum á Íslandi en síðan er hugmyndin að horfa til Norðurlandanna og Evrópu.“