Bóndi í Borgar­firði keyrði Skoda-bíl yfir milljón kíló­metra

„Þetta var spurning sem við hjá Heklu gátum ekki svarað svo auðveldlega enda ekki algengt að bílum sé ekið svo langt,“ segir Berglind Sigurgeirsdóttir, markaðsstjóri Heklu. „Okkur fannst hins vegar saga hans svo skemmtileg og áhugaverð og ekki síður mikill gæðastimpill fyrir Skoda að bíllinn kæmist svo langt. Því buðum við Jómundi í kaffi til okkar enda lék okkur forvitni á að heyra sögu hans.“

Jómundur segir sjálfur ekki hafa heyrt um fleiri fólksbíla sem hafi verið keyrðir rúmlega milljón kílómetra hér á landi. „Ég hef heyrt um fólksbíla sem hafa verið keyrðir 7-800.00 km en ekki yfir milljón. En auðvitað veit ég svo sem ekkert um það.“

Það má svo sannarlega segja að Jómundur hafi gegnum árin tileinkað sér almenna nægjusemi og nýtni og er Skoda Octavia bíllinn gott dæmi um það. Þau hjónin, og einkum Jómundur, hafa varið ófáum stundum í bílnum, mestmegnis á ferðum hans frá heimili þeirra í Mosfellsbæ upp í Borgarfjörð þar sem Jómundur er með sauðfjárbúskap.

Berglind segir að sagan af bílnum sem fór heila milljón kílómetra hafi ein og sér verið ótrúleg en ýmislegt annað átti eftir að koma í ljós að hennar sögn. „Að sögn Jómundar hefur t.d. aldrei verið skipt um kúplingu í bílnum né annað í húddi bílsins, þó svo að vitanlega hafi hann fengið eðlilegt viðhald á bremsum, dekkjum og öðru eins og olíu. Þá hefur Jómundur að eigin sögn ekki hlíft bílnum á neinn hátt. Hann hefur ekið honum á malarvegum í öllum veðrum og meira að segja sett rollur inn í hann þegar á hefur þurft að halda.“

„Allan tímann sem ég átti bílinn var hann með sama mótor, kúplingu, gírkassa og drif, svo dæmi séu tekin,“ bætti Jómundur við.

Starfsfólk Heklu var sammála um saga þessa bíls væri einstök og að hana þyrfti að taka upp og segja fleirum. „Við hófum því framleiðslu á auglýsingu í samstarfi við Jómund, auglýsingastofuna Tvist, Erlend Sveinsson leikstjóra og höfuðstöðvar Skoda í Tékklandi. Jómundur segir sögu sína og stundin þegar bílnum var ekið í milljón var fest á filmu.“

Þess má til gamans geta að Jómundur festi kaup í Skoda Octavia til að leysa þann gamla af hólmi og var sá gamli gefinn til bíltæknibrautar Borgarholtsskóla þar sem hann mun vonandi nýtast nemendum í bifvélavirkjanámi.

Aðspurður hvort hann saknaði gamla bílsins sagði hann ekki svo vera. „Hann reyndist mér vel í langan tíma“.

Bílaumboðið Hekla kynnir hér með stolti þessa fallegu sögu.