Ég skvetti málningu á banda­ríska sendi­ráðið en hér er opið bréf til utan­ríkis­ráð­herra

Þórdís Kolbrún,

ég, Margrét Rut Eddudóttir hef nú mótmælt aðgerðaleysi þínu og ábyrgðarleysi í að verða eitt ár. Í eitt ár hafa þú og Bjarni Benediktsson lagt ykkur fram við að viðhalda þjóðarmorðinu í Palestínu og nú Líbanon. Þú talar um að sýna alþjóðlega ábyrgð með því að vopnavæða Úkraínu á meðan Bandaríkin nota þig eins og búktalara til þess að hvítþvo hryðjuverk sín í Mið-Austurlöndum. Þú berð nú persónulega ábyrgð á þessu þjóðarmorði í Palestínu og hefur gert mig og samlanda okkar samsek.

Þessi hegðun þín teygir anga sína í sálarlíf okkar allra. Meðvirkni með ofbeldinu er að gjöreyða mannkyninu og ég neita að sitja hjá og það ættir þú að gera líka. Þú hefur talað töluvert fyrir hönd afganskra kvenna undanfarið. Það er sárt að sjá hvað þú ert tilbúin að eyða mikilli orku í það á meðan Ísrael og Bandaríkin myrða 6000 saklausar konur og 11000 börn. Samanlögð greining Oxfam og Action on Armed Violence (AOAV) leiðir í ljós að fleiri konur og börn hafa verið myrt á Gaza af ísraelska hernum (og Bandaríkjunum) á síðasta ári en í nokkrum öðrum átökum síðustu áratugi. Gögn AOAV sýna fram á að ísraelsk sprengjuvopn réðust á borgaralega innviði á Gaza að meðaltali einu sinni á þriggja klukkutíma fresti síðan 7. okt 2023. Í víðara samhengi átakanna greinir Oxfam frá því að auk þeirra þúsunda kvenna og barna sem eru drepin er fjöldi óþekktra, týndra eða grafinna undir rústum sem þýðir að fjöldi látinna er hærri en opinberar tölur staðfesta. Nýleg rannsókn Lancet bendir til þess að þegar tekið er tillit til óbeinna dauðsfalla þeirra sem stafa af hungri og skorts á heilbrigðisþjónustu - gæti raunverulegur fjöldi myrtra á Gaza farið yfir 186.000 manns. Þetta er allt bara í Gaza. Á Vesturbakkanum hefur Oxfam tilkynnt að yfir 680 Palestínumenn hafa verið myrtir af Ísrael síðan 7. okt. Yfir þúsundir árásir landnema hafa beinst að palestínsku landbúnaðarlandi, eyðilagt uppskeru, áveitukerfi og gróðurhús, þar á meðal alþjóðleg verkefni sem Oxfam styrkir. 2000 heimili hafa verið rifin sem eykur enn á mannúðarkreppuna af völdum Ísraels og Bandaríkjanna.

Þetta eru allt upplýsingar sem liggja fyrir og hafa verið staðfestar víða frá áreiðanlegum heimildum. Samt sem áður ávarpaðir þú Sameinuðu Þjóðirnar og kenndir saklausu fólki í Palestínu um að það sé búið að sprengja hvert einasta sjúkrahús þar. Út frá óstaðfestum fregnum að Hamas væri undir hverjum einasta steini í Gaza. Ég veit ekki hvort þú gerir þér grein fyrir hversu þróaða tækni Ísrael er að vinna með til þess að misþyrma og myrða saklaust fólk á Gaza, en það þarf ekki mikla heimildavinnu til þess að komast að þeirri niðurstöðu að Ísrael er ekki að reyna útrýma Hamas. Ísrael er að reyna í samráði við Bandaríkin að sölsa undir sig landi.

Þú veist líklegast líka að það eru ekki bara sjúkrahús sem eru sprengd heldur skólar, moskur og allir helstu samkomustaðir Palestínubúa þar á meðal svæði sem eiga að vera örugg. Fólki er sagt að flýja aftur og aftur á svo kölluð “safe zone” þar sem þau hafa stundum 15 til 30 mín til þess að yfirgefa svæðið svo enda þessi “öruggu svæði” á því að verða sprengd. Það er svo langur listi hér þar sem Ísrael og Bandaríkin hafa gerst brotleg á alþjóðalögum og ekki erfitt að leita sér heimilda þegar kemur að öllum þeim hryðjuverkum sem þetta tvíeyki heldur áfram að fremja. Nú eru áhyggjur síðustu mánuða að raungerast og ofbeldið er að breiðast út. Allt þetta hefði verið hægt að koma í veg fyrir hefðum við og nágrannaríki okkar tekið okkur saman og sett Bandaríkjunum mörk. En það hefur núna skýrst fyrir mér að Ísland er í raun ekki sjálfstætt ríki þegar kemur að því að standa vörð um mannréttindi.

Nóg af upptalningu illskunnar og allt um það af hverju ég skvetti rauðri Málningu á Bandaríska sendiráðið

Bandaríkin bera hér höfuð ábyrgð þar sem Ísrael fær 70% af vopnum sínum þaðan. Það er óhætt að segja að allt þetta mannsfall hefði aldrei átt sér stað ef að Bandaríkin væru ekki að knýja gjöreyðinguna áfram. Ísrael fær svo að valsa inn á þing Sameinuðu þjóðanna og þvaðra þar linnulaust og ljúga upp í opið geðið á heiminum sem horfir á þjóðarmorðið í beinni. Bandaríkin beita svo trekk í trekk neitunarvaldi til þess að greiða götu Ísrael við að halda blóðbaðinu áfram. Nú seinast sömdu Bandaríkin um að senda 8,7 billjón bandaríkjadali í formi hergagna til Ísrael. Það eru 1.186 milljarðar, tala sem fæst okkar skiljum, eða náum utan um. Þetta dúó heldur bara áfram að myrða börn og sakleysingja án þess að fá einu sinni smávægilega sekt.

Svo já. Ég skvetti smávegis rauðri málningu á steinsteypu. Ég gerði það ein og ekki í samráði við neinn nema mína betri vitund til þess að að fordæma Bandaríkin, Ísrael, Þýskaland (sem á 29 prósent vopna sem send eru til Ísraels) og Þórdísi Kolbrúnu R. Gylfadóttir sem tekur sér stöðu með Bandaríkjunum.

Kröfur mínar eru sem áður

Að slíta stjórnmálasambandi við Ísrael, koma á viðskiptaþvingunum og að taka undir mál S-Afríku gegn Ísrael vegna þjóðarmorðsins í Palestínu í Alþjóðadómstólum. Síðast en ekki síst að mynda sjálfstæða skoðun um ástandið sem er ekki ritskoðuð af Bandaríkjunum og koma henni á framfæri og í jákvæðan farveg. Við sem þjóð erum of vel upplýst til þess að láta mata okkur á hlutdrægum fréttum valdhafanna og núna er tíminn til þess að móta okkar utanríkisstefnu með mannúð að leiðarljósi en ekki meðvirkni og eyðileggingu.

Að lokum langar mig að þakka fyrir mig þennan dag. Þetta var falleg ganga þó svo að tilefnið hafi verið átakanlegt. Ég vil þó benda lögreglunni á að það hafi myndast töluverð hætta þar sem hún var ekki undirbúin að leiða hópinn í gegnum umferðina við gatnamótin Suðurlandsbraut, Kringlumýrarbraut. Lukkulega voru engin slys og þetta verður vonandi athugað fyrir næstu göngu.

Auðmjúk málningarskvettukveðja,

Margrét Rut Eddudóttir

Höfundur er sjúkraliði og myndlistarkona.