Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.
Hvenær vaknar þú á morgnana?
„Klukkan er stillt á 7.40 í þeim tilgangi að tryggja að menntaskólanemi heimilisins komi sér af stað, svo kúri ég gjarnan aðeins áfram. Ég er langt frá því að vera týpan sem sprett upp á morgnana og fer í handahlaupum af stað.“
Hvað er það fyrsta sem þú gerir á morgnana?
„Ég elska þegar ég get tekið því rólega á morgnana, fengið mér kaffi og sest við tölvuna á náttfötunum. Ég er oft á fjarfundum á morgnana, þó ekki á náttfötunum, vegna verkefna erlendis og hef því oft vinnudaginn heima, funda, fer yfir tölvupósta og helstu verkefni áður en ég fer út í daginn.“
Þegar þú varst unglingur: Hvaða sjónvarpssería var í uppáhaldi?
Þegar ég var unglingur var að hefjast mikil gósentíð í sjónvarpi og úrvalið að stóraukast, samanborið við fyrri ár þar sem Dallas var ljósið í myrkrinu. Uppáhaldið á þessum tíma var auðvitað Beverly Hills 90210 og Melrose Place, enda lifðu karakterarnir þar miklu draumalífi að mér fannst og svo voru þau auðvitað svo falleg!
Ég verð einnig að játa að á menntaskólaárunum lá ég líka í sápudrama, meistarastykkjum eins og Santa Barbara og Leiðarljósi. Við vinkonurnar rukum oft heim eftir skóla með nammi í poka til að ná sýningu dagsins og heimalærdómurinn fékk að bíða.“
Í hvaða verkefni ertu að vinna helst í þessa dagana?
„Starfið mitt er mjög fjölbreytt blanda af kennslu, leiðbeiningu framhaldsnema, rannsóknum og stjórnunarstörfum. Til dæmis er ég önnur aðalrannsakenda rannsóknarinnar Áfallasaga kvenna, ásamt Unni Önnu Valdimarsdóttur, þar sem við erum nú á fullu við að vinna úr þeim gögnum og koma út niðurstöðum, ásamt því að leggja lokahönd á nýjan spurningalista sem verður sendur til þátttakenda á næstunni.
Þá stýri ég undirrannsókn Áfallasögu kvenna sem heitir Lóa og er markmið hennar að þróa einfalt hugrænt inngrip sem getur bætt líðan fólks eftir áföll.
Sú rannsókn hefur verið í undirbúningi í nokkur ár og er stefnan að hefja hana á næstu dögum og er ótrúlega spennandi verkefni.
Einnig má nefna að nýverið tók ég sæti í stjórn Vísindagarða, sem eru í eigu Háskóla Íslands og Reykjavíkurborgar, og staðsettir í Vatnsmýrinni. Ég er mikil háskólamanneskja og hefur þótt frábært að sjá hvernig háskólasvæðið hefur þróast til hins betra á síðustu árum. Vísindagarðar hafa spilað stórt hlutverk í þróun svæðisins, meðal annars með tilkomu Grósku. Það má segja að Vísindagarðar séu samfélag nýsköpunar og rannsókna og er mikil og spennandi uppbygging fram undan þar. Sem dæmi má nefna fyrirhugaða uppbyggingu á Djúptæknikjarna, auk nýrrar byggingar á lóð við hliðina á Grósku, sem ber vinnuheitið Viska.“
Hvernig skipuleggur þú þig í vinnu?
„Eins og fyrir mörg er Outlook mitt helsta haldreipi. Þegar margt er í gangi og verkefnalistinn langur finnst mér einnig stórgott að grípa í blað og penna og skrifa lista upp á gamla móðinn, enda mjög þakklátt að fá að strika yfir unnin verk!“
Hvenær ferðu að sofa á kvöldin?
„Það kemst fljótt yfir mig værð á kvöldin, og eftir eitthvað áhorf er ég oftast komin upp í rúm um ellefuleytið.“
