Það var svo sem vitað að netaupptaka myndi skila betri göngum í árnar en það áttu ekki margir von á því að stökkið yrði svona mikið. Stóra Laxá hefur sem dæmi sjaldan eða aldrei byrjað jafn vel og hún hefur gert en heildarveiðin í ánni er komin í 225 laxa og síðasta veiðivika skilaði hvorki meira né minna en 100 löxum.
Veiðin er vel dreifð um alla ána og meira að segja ólíkt því sem vanir menn við Stóru Laxá eiga að venjast, mjög góð á svæði III. Veiðistaðir eins og Kóngsbakki og Stekkjarnef sem eru neðstu staðirnir á neðra svæðinu hafa verið fullir af laxi. Efra svæðið að sama skapi hefur verið feyknagott og laxinn er farinn að dreifa sér vel um allt svæðið þó svo að nokkrir veiðistaðir séu heitari en aðrir. Það er ekkert ólíklegt að heildartalan í Stóru Laxá fari yfir 1.000 laxa í ár og staðarhaldarar eru þegar farnir að finna fyrir því hvað góður árangur og uppfærsla á veiðihúsum hefur verið að skila en bókanir fyrir árið 2023 eru þegar farnar á fullt.
