Viðskipti erlent

Telja stjórn Twitter á milli steins og sleggju

Tryggvi Páll Tryggvason skrifar
Elon Musk vill kaupa Twitter.
Elon Musk vill kaupa Twitter. Jakub Porzycki/NurPhoto via Getty Images)

Stjórn samfélagsmiðla fyrirtækisins Twitter eru undir þrýstingi vegna kauptilboðs auðkýfingsins Elon Musk samkvæmt frétt Financial Times.

Musk, sem helst er þekktur sem stofnandi og eigandi bílaframleiðandans Tesla og geimfyrirtækisins SpaceX, hefur gert 43 milljarða dollara kauptilboð í allt hlutafé Twitter.

Hann á nú þegar 9,2 prósent í fyrirtækinu  eins og greint hefur verið frá

Musk hefur verið gagnrýninn á stefnu samfélagsmiðilsins þegar kemur að tjáningarfrelsi. Twitter er stofnað árið 2006 og samfélagsmiðillinn er einn sá mikilvægasti í heimi. En ákvarðanir stjórnenda um að ritskoða eitt og annað í nafni heilbrigðs lýðræðis eru í auknum mæli umdeildar á meðal Bandaríkjamanna; samanber ákvörðunina um að banna Trump í aðdraganda síðustu forsetakosninga þar í landi.

Stjórn Twitter hefur gripið til varna og gefið út að gamalt bragð verði dregið upp úr pokahorninu til að koma í veg fyrir yfirtöku Musk á Twitter, eins og fjallað var um á Vísi á dögunum.

Í frétt Financial Times sem birtist í morgun segir þó að stjórn Twitter sé á milli steins og sleggju, þrýstingur á hana komi úr mörgum áttum eftir yfirtökutilboð Musk.

Musk greindi frá því í gær að hann væri búinn að tryggja sér fjármögnun til að standa við yfirtökutilboðið. Stjórn Twitter er sögð vera undir þrýsting að ýmist ganga til samninga við Musk, eða finna aðra fjársterka fjárfesta sem gætu keppt við Musk.

Telja Twitter geta vaxið hraðar en raunin hefur verið

Þannig segir í frétt Financial Times að vonir standi til þess að tilboð Musk geri það að verkum að Twitter verði keypt og tekið af markaði, hvort sem hann eða einhvar annar ótilgreindur aðili standi fyrir því.

„Twitter hefur verið þróað til að ná aðeins brotabroti af möguleikum sínum,“ er haft eftir ónefndum fyrrverandi stjórnarmanni Twitter í frétt Financial Times. „Já, það ætti að vera tekið af markaði. Það er heimur þar sem fyrirtækið getur skapað sér tíu til hundrað sinnum stærri markað.“

Haft er eftir öðrum ónafngreindum fjárfesti sem sérhæfir sig í fjárfestingum í tæknifyrirtækjum að mögulega sé stjórn Twitter föst á milli þess að þykja tilboð Musk ekki nógu gott, en geta sjálf ekki komið því til leiðar að Twitter vaxi og dafni.

Vöxtur Twitter hefur verið hægari en vöxtur samfélagsmiðla á borð við Facebook og LinkedIn.

Í frétt Financial Times kemur einnig fram að Thoma Bravo, fjárfestingafélag sem sérhæfir sig í yfirtökum á tæknifyritækjum, og á yfir 100 milljarða dollara í eignir, hafi sett sig í samband við Musk í þeim tilgangi að ræða mögulega aðkomu Thoma Bravo að yfirtökunni.

Frétt Financial Times má lesa hér.


Tengdar fréttir

Musk getur ákveðið að gleypa eitruðu pilluna

Fólk skiptist í fylkingar eftir afstöðu þess til áforma ríkasta manns heims um að kaupa Twitter. Stjórn fyrirtækisins reynir nú allt til að stöðva auðkýfinginn, Elon Musk.

Dómari segir Musk hafa logið um að taka Tesla af markaði

Dómari hefur komist að þeirri niðurstöðu að Elon Musk, auðugasti maður heims, laug þegar hann hélt því fram í tístum árið 2018 að hann hefði tryggt sér fjármögnun til að taka bílafyrirtækið Tesla af markaði. Hann sagðist ætla að kaupa öll hlutabréf félagsins á 420 dali á hlut.

Nota gamalt bragð til að grípa til varna gegn yfirtöku Musks

Forsvarsmenn Twitter hafa gripið til varna til að koma í veg fyrir mögulega yfirtöku auðjöfursins Elons Musk á samfélagsmiðlafyrirtækinu. Með það markmið hefur stjórn Twitter notast við gamalt bragð á hlutabréfamarkaðinum sem myndi gera hluti Musks, og annarra, lítils virði.

Elon Musk vill taka yfir Twitter

Milljarðarmæringurinn Elon Musk hefur boðist til þess að kaupa Twitter á 41 milljarð bandaríkjadala. Hann segir nauðsynlegt að taka fyrirtækið af hlutabréfamarkaði til að ná fram raunverulegum breytingum og viðunandi árangri á samfélagsmiðlinum.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.